Pasha Hаyat Sigorta ili mənfəətlə yekunlaşdırıb

Yerli sığorta bazarında ən çox mənfəət həyat sığortası sahəsində əldə olunur. Həyat sığortası üzərində ixtisaslaşmış «Pasha Hаyat Sigorta» şirkətinin ötən il 4 mln. 284,48 min manat xalis mənfəət əldə etməsi bunun sübutudur. Bu, kapitala ciddi əlavə, bununla belə, əvvəlki ildəki nəticədən açıq-aşkar (-46,9%) geriləmədir. Belə ki, 2013-cü ildə bu göstərici 8 mln. 70,9 min manat təşkil edib.

Auditor rəyi ilə təsdiq edilmiş maliyyə hesabatına əsasən, maliyyə qurumunun ümumi gəliri 18 mln. 912,54 min manat təşkil edib. Sığorta pulları 41 mln. 901,12 min manat, investisiya gəlirləri 5 mln. 299,66 min manat olub. Yekunlara mənfi xalis sığorta ehtiyatları (28 mln. 665, 54 min manat) da təsir edib ki, bu, gəlirlərin azalmasına gətirib çıxarıb. Ötən il ərzində şirkətin xərcləri 13 mln. 480,1 min manat təşkil edib. O cümlədən, sığorta işinin aparılmasına 9 mln. 310,15 min manat, sığorta ödənişlərinə 2 mln. 867,13 min manat xərclənib, qalan xərclər başqa maddələr üzrə sərf olunub.

Şirkətin aktivləri 77,5% artaraq, 91 mln. 832,43 min manat, öhdəliklər 2,57 dəfə artaraq 47 mln. 125,25 min manat, şirkətin öz kapitalı 33,7% artaraq 44 mln. 707,18 min manat təşkil edib.

Maliyyə qurumunun nizamnamə kapitalı 59,7% artaraq 40,25 mln. manat təşkil edib. Banklarda depozitlərin həcmi də 72,8% artaraq, 40 mln. 401,84 min manata çatıb.

"Pasha Hayat Sigorta" ASC 2010-cu ildə yaradılıb. Sığorta fəaliyyəti üçün lisenziyanı 14 fevral 2011-ci ildə alıb. Şirkətin yeganə səhmdarı "Pasha Holding"dir. -17D-