Pilot heyvandarlıq təsərrüfatı yaradılır

“Yalama” dövlət cins heyvandarlıq təsərrüfatının torpaq sahəsi müsabiqəyə çıxarılıb. İddiaçılar iyunun 17-ə qədər torpağın becərilməsi, müasir heyvandarlıq və südçülük təsərrüfatının yaradılması üzrə təkliflər verməlidir.

Dövlət Torpaq və Xəritəçəkmə Komitəsində Turan-a bildiriblər ki, Xaçmazdakı təsərrüfatın 523 ha torpağı var. Müsabiqə şərtlərinə əsasən, torpaq 49 illiyə icarəyə veriləcək. İcarə qiyməti ildə 10 460 manatdır. Dövlətin adından icarədar Xaçmaz rayon İcra Hakimiyyətidir.

Müsabiqəyə müvafiq təcrübəsi olan şəxslər buraxılır. Yeni təsərrüfatda heyvandarlıq kompleksi tikilməli, damcılı suvarma sistemi yaradılmalı, avtomobil yolu çəkilməli, zəruri mühəndis infrastrukturu yaradılmalıdır. İnvestor dövlətdən güzəştli kredit də alacaq.

Müsabiqə Nazirlər Kabinetinin 12 sentyabr 2013-cü il tarixli № 254 sərəncamı ilə keçirilir.

Buna qədər Azərbaycanda dövlət torpaqları icarəyə verməklə bir neçə iri taxılçılıq fermer təsərrüfatı yaradılıb. Hökumət bu yolla ərzaq təhlükəsizliyini təmin etmək istəyir. Bunun üçün yaxın illərdə 160 mindən çox dövlət torpağından istifadə ediləcək. Həmçinin «Kənd təsərrüfatı kooperasiyası haqqında» qanun layihəsi hazırlanıb və üçüncü oxunuşa təqdim edilib. 08B