Prezident İlham Əliyev «DP World» şirkətlər qrupunun rəhbərini qəbul edib

Sentyabrın 7-də prezident İlham Əliyev “DP World” şirkətlər qrupunun sədri və icraçı direktoru Sultan Əhməd bin Sulaimi qəbul edib. Prezidentin mətbuat xidməti görüşün təfərrüatlarını açıqlamır.

Lakin Dubayın iri nəqliyyat şirkətinin rəhbərinin səfəri bzi mülahizələr yürütməyə əsas verir.

2005-ci ildə təsis edilmiş şirkətin mənzil-qərargahı Dubaydadır. Şirkətin 110 ölkədə ofis və nümayəndəliyi, onlarla ölkədə nəqliyyat obyektləri (limanlar, bərələr, terminallar)  var.

Şirkət bütün dünya üzrə dəniz və quru daşımalarının logistikası, göndərişi və təchizarı ilə məşğul olur. Kapital dövriyyəsi milyardlarla dollar ilə ölçülür. İşçilərin sayı 37 min nəfərdir.

  DP World-un altı qitənin 40 ölkəsində fəaliyyətdə olan 77 dəniz və daxili terminalı, 50 qarışıq müəssisəsi var. Konteynerlərin boşaldılması və yüklənməsi şirkətin əsas fəaliyyət formasıdır. Gəlirin  75%-dən çoxu bunun payına düşür. 2015-ci ildə gəlir 3 mlrd. dolları ötüb.

Görünür, DP World Azərbaycan, Rusiya və İranın iştirakı ilə həyata keçirilən “Şimal-Cənub” nəqliyyat layihəsinin iştirakçısı olmaq niyyətindədir. Məntiqlə və maliyyə baxımından Dubay şirkəti “Şimal-Cənub” və “Şərq-Qərb” layihələri iştirakçılarının daha sərfəli və əlverişli tərəfdaşı ola bilər.

Azərbaycana gəlincə,  Bakı yeni nəqliyyat limanının və Səngəçalda terminalın inşasında, “Şimal-Cənub” marşrutu üzrə yüklərin hərəkətinin logistikası və servisinin təşkilində DP World-un iştirakını gözləmək olar.

Həmçinin Çindən Orta Asiya, Azərbaycan və sonra Avropaya nəqliyyat dəhlizinin təşkilində də dubaylıların iştirakını istisna etmək olmaz.-02В-