Qazaxıstanın Azərbaycanda iştirakı məqbul səviyyədə deyil

2002-2013-cü illərdə Qazaxıstan Azərbaycan iqtisadiyyatına $5,2 mln sərmayə qoyub. 2011-2013-ci illərdə Azərbaycanın Qazaxıstana birbaşa investisiyaları $132,8 mln olub, deyə iqtisadiyyat və sənaye naziri Şahin Mustafayev Aktauda Azərbaycanda İxracın və İnvestisiyaların Təşviqi Fondu (AZPROMO) və Qazaxıstan Respublikasının Manqistau vilayəti Akimliyinin təşkilatçılığı ilə biznes forumda bildirib.

Onun sözlərinə görə, iki ölkə arasında 100-dən çox sənəd, o cümlədən iqtisadi sahədə 25 sənəd imzalanıb. Amma iqtisadiyyatların yaxınlaşması tempi yüksək deyil. 2013-cü ildə iki ölkə arasında ticarət dövriyyəsi 371 mln ABŞ dollarına yaxın olub (yarıdan çoxu taxıl hesabına).

Forumda qida sənayesi, kənd təsərrüfatı, sənaye, tikinti və başqa sahələri təmsil edən 100-dən çox şirkət iştirak edib.

Nazirin sözlərinə görə, 1 yanvar 2014-cü il üçün Azərbaycanda Qazaxıstan sərmayələri əsasında ticarət, nəqliyyat, sənaye, kənd təsərrüfatı, xidmət, bank, sığorta, rabitə və tikinti sahələri üzrə aktiv 52 şirkət qeydiyyata alınıb. Qazaxıstanda isə sənaye, tikinti, kənd təsərrüfatı və ticarət sahələri üzrə Azərbaycan investisiyalı 723 şirkət qeydiyyatdan keçib.

“Azpromo” 2003-cü ildə qeyiyyata alınıb. 2005-ci ilin avqustundan ixracın təşviqi ilə məşğuldur. Əvvəllər məsləhət xidməti ilə məşğul olub. --17D—