Qiymətli kağızlar bazarı üçdə bir daralıb

 Azərbaycanda qiymətli kağızlar bazarında gözlənilməzlik tendensiyası davam edir. Korporativ istiqraz bazarında 2 dəfə artım fonunda dövlət qiymətli kağızların dövriyyəsi 40% azalıb. 

Qiymətli Kağızlar üzrə Dövlət Komitəsinin məlumatına görə, QK bazarının dövriyyəsi bu ilin 9 ayında 5,5 mlrd manat olub. Bu, ötən ilin eyni dövründəkindən 32% azdır. Bazarda azalmanın səbəbi AMB-nin repo və kontr-repo əməliyyatlarının həcminin 6,4 mlrd-dan 4 mlrd manata azalmasıdır. Dövlət qiymətli kağızları ilə əməliyyat həcmi 541 əqd üzrə 4 385,7 mln manat olub. Bu, 2012-ci ilin eyni dövründəkindən 40% azdır. 

Korporativ seqmentdə müsbət tendensiya olub. İlin əvvəlindən səhmlər və korporativ əqdlər üzrə 3 644 əqd bağlanılıb. Bu, ötən ilin eyni dövründəkindən 8% çoxdur. Onların dövriyyəsi 1 140,1 mln manat olub. Bu, 2012-ci ilin eyni dövründəkindən 27% çoxdur. Səhm bazarının həcmi 13% artaraq 448,2 mln manat təşkil edib. Bu bazarda artım birjadankənar dövriyyə sayəsindədir. QKDK birjadankənar dövriyyə barədə məlumatları açıqlamasa da, birja əqdlərinin müqayisəsi göstərir ki, təkrar bazarda onların payı 90%-dir. Təkrar səhm bazarında 2,4 dəfə artım var. 

Hesabat dövründə səhmlərin ilkin yerləşdirilməsi həcmi 324,8 mln manat olub. Bu, 2012-ci ilin eyni dövründəkindən 6% azdır. 

Korporativ istiqrazlar bazarının həcmi 692 mln manat təşkil edib. Bu, 2012-ci ilin eyni dövründəkindən 2,3 dəfə çoxdur. İstiqraz dövriyyəsinin üçdə ikisi (461,3 mln manat) təkrar bazarın payına düşür. 08D