Xəzər Dəniz Gəmiçiliyi ilə ARDNŞ Donanmasının birləşdirilməsi sahənin maliyyə axınını mərkəzləşdirir

Azərbaycanda dəniz gəmiçiliyi və gəmi parkı mərkəzləşdirilib. Bu günlərdə prezident İlham Əliyevin sərəncamı ilə Xəzər Dəniz Gəmiçiliyi və Azərbaycan Respublikası Dövlət Neft Şirkətinin Xəzər Dəniz Neft Donanmasının əsasında “Azərbaycan Xəzər Dəniz Gəmiçiliyi” Qapalı Səhmdar Cəmiyyəti yaradılması barədə sərəncam imzalayıb. 

Bu qərarın məqsədəuyğunluğu barədə Turan-ın sualını cavablandıran ARDNŞ ictimai əlaqələr idarəsinin rəhbəri Nizaməddin Quliyev bildirib ki, gəmiqayırma zavodunun işə düşməsi (layihəni ARDNŞ ilə Azərbaycan İnvestisiya Şirkəti və Sinqapurun Keppel Offshore & Marine şirkəti icra edib, onların payı 65, 25 və 10%-dir) və yeni liman tikintisi mərkəzləşməni şərtləndirib. Bundan başqa, ARDNŞ təkcə Xəzərdə yox, Qara dəniz-Aralıq dənizi hövzəsində aktiv oyunçuya çevrilib. 

XDG və Dövlət Neft Şirkətinin Xəzər Dəniz Neft Donanması eyni funksiyanı yerinə yetirirdi. Ona görə vahid struktura ehtiyac vardı, - deyə o qeyd edib. 

"Rauf Vəliyevin QSC-nin rəhbəri təyin edilməsinə gəlincə, o, ARDNŞ nəqliyyat idarəsinin rəisidir, əvvəl gəmi kapitanı olub, idarəçilik təcrübəsi var. Gəncdir, enerjilidir", - deyə Quliyev əlavə edib. 

Yeni strukturun balansında 330 gəmi var. Onların bir çoxunun vaxtı keçib – ARDNŞ Xəzər Dəniz Neft Donanmasının 250, XDG-nin 80 gəmisi olub. 2003-cü ildən xarici tərsanələrdə BP-nin sifarişi ilə 16 gəmi tikilib. 

Ekspertlərin fikrincə, “Azərbaycan Xəzər Dəniz Gəmiçiliyi” QSC-nin nyaradılması ARDNŞ rəhbərliyinin nəqliyyat mövqelərinin zəifləməsi deyil. Şirkətin prezidenti Rövnəq Abdullayev özü Rauf Əliyevin namizədliyini verib.–0--