QK bazarının korporativ seqmenti 65% artıb

2013-cü ilin I rübündə  ilkin və təkrar korporativ kağızlar bazarının həcmi 146,3 mln manat olub. Bu, 2012-ci ilin eyni dövründəkindən 65% çoxdur. Artım maliyyə sektoru, səhm bazarı və maliyyə strukturlarının istiqrazları hesabına olub. 

Qiymətli Kağızlar üzrə Dövlət Komitəsinin hesabatına əsasən, I rübdə səhm yerləşdirilməsi həcmi 45 mln manat (+2,7 dəfə), istiqrazların açıq və qapalı yerləşdirilməsi 29,5 mln manat (+34%) olub. Qeyri-mütəşəkkil bazarda səhmlərin təkrar dövriyyəsi (44,3 mln manat) birja göstəricisini 15 dəfə keçib. 2012-ci ilin I rübü ilə müqayisədə birjadankənar səhm bazarında 77% artım olub. Korporativ iqtiqrazların təkrar bazarı (24,5 mln manat) ötən ilin səviyyəsində qalıb. İstiqrazlarla əməliyyatların əsas hissəsi AİF-in QK-nın payına düşür. 

Səhm bazarının həcmi 92,2 mln manat (+2,2 dəfə), korporativ iqtiqrazlar bazarının həcmi 54 mln manat (+17%) olub.

Korporativ bazarda QK-ın alqı-satqısı üzrə 1000 əqd bağlanılıb. Bu, 2012-ci ilin I rübü ilə müqayisədə 4% azdır. Əqdlərin əsas hissəsi səhmlər üzrədir. Bakı Fond Birjasında 805 əqd, qeyri-mütəşəkkil bazarda 209 əqd bağlanılıb. 

“2011-2020-ci illərdə Azərbaycan Respublikasında qiymətli kağızlar bazarının inkişafı” Dövlət Proqramı və «Azərbaycan -2012: Gələcəyə baxış» Konsepsiyaı hökumətin qarşısına QK-ın qeyri-mütəşəkkil bazarını minimuma endirmək vəzifəsi qoyub. Amma bu qeyri-şəffaf bazarda çiçəklənmə var. 08B