Riçard Treysi: Azərbaycan dünyanın bəzi ən dadlı məhsullarına malikdir

ABŞ Ticarət Departamentinin Kənd Təsərrüfatı sektorunun səmərəliliyini artırmaq üçün Ümumdünya Soyuducu Anbarlar Alyansı ilə tərəfdaşlığı çərçivəsində Azərbaycanda kənd təsərrüfatı sektorunun iqtisadi həcminin artırılmasına kömək edəcək.

Bu məqsədlə sentyabrın 9-da Hyatt Konfrans Mərkəzində soyuducu anbarlar və soyuducu təchizat zənciri mövzusunda seminar keçirilib. Seminarda 50 azərbaycanlı sənaye mütəxəssisi iştirak edib.

Forumda ABŞ hökumətinin dəstəyi ilə Ümumdünya Soyuducu Anbarlar Alyansının mütəxəssisləri Azərbaycanda iqtisadiyyatın şaxələndirilməsi, kənd təsərrüfatı sahəsinin inkişafına dəstək olaraq qida saxlanması və daşınması prosedurlarını modernləşdirməyə yardımın yollarından danışıb.

Ümumdünya Soyuducu Anbarlar Alyansının (ÜSAA) vitse-prezidenti Riçard Treysi (Richard Tracy) seminarda iştirak edən azərbaycanlı sənaye mütəxəssislərinə soyuducu anbarlar sahəsində yeni innovasiyalar, texnologiyalar, həmçinin enerjiyə qənaət və effektivliyin optimallaşdırılması yollarından danışıb. 

Onun sözlərinə görə, Azərbaycanda bir çox müəssisələrdə qidanın saxlanılması şərtləri beynəlxalq standartlara cavab verir.

“Biz Azərbaycanda aqrobiznesin potensialının genişləndirilməsinə və kənd təsərrüfatı məhsullarının həm Azərbaycan, həm də xaricə çıxarılmasına yardım göstərməyə çalışacağıq. ÜSAA-nın 75 ölkədə təmsilçiliyi var. Bizim əsas məqsədimiz bütün dünyada qidanın təhlükəsiz şəkildə nəql edilməsi təmin etməkdən ibarətdir. Mən Azərbaycanda qidanın saxlanılması şərtlərini gördüm. Və mütəəssir oldum ki, onlar tamamilə beynəlxalq standartlara cavab verir. Lakin bəzi obyektlər var ki, onların beynəlxalq standartlara cavab verməsi üçün yardım göstərilməlidir”, deyə Riçard Treysi Turan-ın sualına cavabda bildirib.

Xatırladaq ki, ABŞ Ticarət Departamenti 6-8 sentyabrda Ucar, Samux, Xaçmaz, Xırdalan və Bakıda kənd təsərrüfatı şirkətlərinin soyuducu anbar obyektlərinin qiymətləndirilməsini aparmaq üçün 3 ekspert dəvət edib. Ekspertlər səmərəliliyi və hasilatı artırmaq məqsədi ilə soyuducu anbarların müasirləşdirilməsi üçün ən zəruri həll yollarını müəyyən etməkdə Azərbaycan şirkətlərinə yardım göstərir.

Ekspertlər inanır ki, əməkdaşlıq nəticəsində Azərbaycan şirkətləri yeni bazarlar əldə edilməsinə nail olacaq.

Biz 5-6 kənd təsərrüfatı müəssisəsinə baş çəkmişik. Burada olan soyuducu kameraların keyfiyyəti həqiqətən çox yaxşıdır. Bəzi şirkətlər isə bu istiqamətdə daha da təkmilləşmək istəyirlər. Biz də onlara bu yolda yardım göstərəcəyik”, deyə Treysi qeyd edib.

O, Azərbaycan kənd təsəsrrüfatı məhsullarının Amerika bazarında rəqabətliliyi ilə bağlı sualın cavabında deyib ki, Azərbaycanın dünyanın bəzi ən dadlı məhsullarına malik olduğunu hamı bilir.

“Amma, belə sual yaranır ki, onu kifayət qədər yetişdirə  bilərlərmi ki, qiymət baxımından rəqabətə davamlı olsun. Kartof, pomidor elə məhsullara daxildir ki, orada daha vacib faktor qiymətdir. Çünki dünyada elə məhsullar var ki, onların qiymət mənasında rəqabətliliyi yoxlanılır. Digər tərəfdən nar kimi  məhsul sahəsində Azərbaycanın çox böyük üstünlüyü var. Azərbaycan dünyada bu məhsulun ixracı üzrə rəqabətə davamlı şəkildə çıxış edə bilər”, deyə vitse-prezident bildirib. -03C-