RWE çıxandan sonra Nabucco konsorsiumu yenidən formalaşacaq

Nabucco Gas Pipeline International GmbH (NIC) konsorsiumu 9-10 səhmdar tərkibində qurmaq istəyir. Bu barədə şirkətin icraçı direktoru R.Mitçek bəyan edib. 

"Səhmdarların strukturuna 2013-cü ilin I yarısında yenidən baxılacaq, boru kəmərinin marşrut seçimi barədə qərardan sonra ona yenə yenidən baxılacaq", - deyə Mitçek bildirib. 

O həmçinin qeyd edib ki, Almaniyanın RWE şirkəti layihədən çıxmaq qərarına gəlib. Ona görə Nabucco West səhmdarları layihəyə “Şahdəniz” yatağı layihəsindən səhmdarlar cəlb edəcək. 

Xatırladaq ki, “Şahdəniz” layihəsinin əsas tərəfdaşları ilə Nabucco qaz kəməri layihəsinin səhmdarları arasında əməkdaşlıq, maliyyələşmə və sahiblik sazişi 18 yanvarda Vyanada imzalanıb. 

Saziş Nabucco West layihəsi ilə bağlı xərclərin “Şahdəniz” qazının nəqli üçün marşrut seçilənə qədər birgə ödənilməsini nəzərdə tutur. Əgər Nabucco West seçilsə, “Şahdəniz” üzrə tərəfdaşlar (ARDNŞ, BP, Statoil və Total) layihədə 50% paya malik olacaq. 

*Uzunluğu 1,3 min km olan Nabucco West Türkiyə-Bolqarıstan sərhədindən Mərkəzi Avropada qaz paylayıcısı Baumqartenə kimi boru kəməri çəkilməsini nəzərdə tutur. 

** RWE layihədən çıxandan sonra Nabucco səhmdarları bunlardır: OMV Gas GmbH (Avstriya), BOTAS (Türkiyə), Bulgargaz (Bolqarıstan), Transgaz S.A. (Rumıniya), FGSZ (Macarıstan). --0--