Səkkiz ayda Azərbaycan banklarının yekun mənfəəti 225 mln manata çatıb

Yanvar-avqustda Azərbaycanda fəaliyyət göstərən bankların ümumi gəlirləri 1340,31 mln manat olub. Bu, ötən ilin eyni dövründən 455,31 mln manat və ya 51,4% çoxdur. Faiz olmayan gəlirlər 6,2% artaraq  273,69 mln manat olub.

Bankların xərcləri 124,75 mln manat və ya 14,3% artaraq 997,7 mln manat olub. Aktivlər üzrə ehtiyat ayırmalar ötən ilin eyni dövrü ilə müqayisədə 34,13 mln manat və ya 25% azalaraq 102,34 mln manat (aktivlər il ərzində 26% artıb) olub.

AMB-dən Turan-a verilən məlumata görə, bank gəlirlərinin strukturunda əsas hissə faiz gəlirlərinin – 79,6%, xərclərdə faiz ödəmələrinin (53,3%) payına düşüb.

Bankların vergi ödənilənədək illik mənfəəti 240,21 mln manat olub. Bu, 2012-ci ilin eyni dövründəkindən 2,4 dəfə çoxdur. Bank sisteminin yekun mənfəəti il ərzində 2,5 dəfə artaraq 224,97 mln manat olub. Sektorda daha çox mənfəət (252,98 mln manat) 2009-cu ildə olub. 

2013-cü ilin 8 ayında 40 bank rentabelli işləyib. Onların ümumi xalis mənfəəti 238,12 mln manat olub. 3 ziyanla işləyən bankın itkisi 13,15 mln manat təşkil edib. 2012-ci ilin eyni dövrü ilə müqayisədə mənfəətli bankların sayı 7 vahid artıb. Ziyanla işləyən bankların sayı o qədər, onların ümumi itkisi isə 7,1 dəfə azalıb. --15В--