Pol Qobl: Rusiya Azərbaycanı özü itələyir

Miqrasiya problemini polis basqınları və proqramları ilə həll etmək cəhdləri tamamilə yanlışdır, Rusiyada bu cəhdlər heç bir yaxşı nəticəyə gətirib çıxarmayacaq. Bu barədə “Rosbalt”a müsahibəsində keçmiş SSRİ-i üzrə məşhur amerikalı ekspert, Dünya Siyasəti İnstitutunun professoru Pol Qobl bildirib.

“Gərginliyin səbəbi təkcə rusların bəzi miqrantların kriminal fəallığından narazılığında deyil, həm də böyük Rusiya şəhərlərinin milli tərkibinin kəskin şəkildə dəyişməsindədir. Eyni zamanda, Rusiyada miqrantlar probleminin həll olunması yolları tamamilə qəbuledilməzdir. Talanlar və hətta polis basqınları ilə problemi həll etmək olmaz. Hər şey qanun çərçivəsində olmalıdır”, deyə o qeyd edib.

“Ölkənin nüfuzlu olması üçün onun üç şeyi olmalıdır: güclü iqtisadiyyat, etibarlı təhlükəsizlik sistemi və cəlbedici imici. Rusiyada bunların heç biri yoxdur. Lakin Kreml keçmiş tərəfdarlarına öz iradəsini diktə etməyə çalışır və onlarla özünü yuxarıdan aşağı aparır. Bunun parlaq nümunəsi hazırda Rusiyanın Azərbaycan XİN-in bəyanatlarına (Biryulevo hadisələri ilə bağlı) məhəl qoymaması, mahiyyətcə, Bakını Rusiyadan üz çevirməyə təhrik etməsidir. Moskva Kiyevə bu qədər açıq-aşkar təzyiq göstərməsəydi, Ukrayna Rusiya ilə daha sıx inteqrasiyaya razılaşardı”, deyə ekspert bildirib.

Qobl həmçinin hesab edir ki, Rusiyada islamlaşma təmayülü var, vəziyyət dəyişməsə, bu, mütləq baş verəcək.

“Bunun baş verməsi ehtimalının yüksək olması üç amillə izah olunur. Ruslarda kişi əhali arasında doğum sayı səviyyəsi Avropa səviyyəsi, ölüm sayı səviyyəsi isə Afrika səviyyəsi ilə eynidir.

Bu zaman etnik müsəlmanlar bu gün 144 milyonluq Rusiya əhalisinin 21-23 milyon nəfərini təşkil edir (15%), həm də onların payı sürətlə artır. Belə ki, Rusiyalı müsəlman qadın orta hesabla 2,3 uşaq dünyaya gətirir, rus qadınıar isə orta hesabla 1,4 uşaq. Rusiyada müsəlmanların payını xeyli artıran digər amil məhz Orta Asiyadan miqrasiyadır”, deyə Qobl bildirib.

Belə gedərsə, dünyanın geosiyasi sistemində qlobal dəyişiklik baş verəcək. Kommunist sisteminin tənəzzülündən daha böyük dəyişiklik. Axı min ilə yaxındır dünyada Rusiyanı xristian ölkəsi kimi tanıyırlar, deyə o əlavə edib.

Qobl belə bir dəyişikliyin ABŞ-ı qane edəcəyini düşünmür.

ABŞ-ın bir çox müsəlman ölkələri ilə çox yaxşı münasibətləri var. Hər şey Rusiyada hakimiyyətə hansı müsəlmanların gələcəyindən asılıdır. Bu, ümumilikdə islamın yumşaq, dözülə bilən formasına sitayiş edən tatar müsəlmanlar olsa, bu, Qərb üçün tamamilə məqbul ola bilər. Rusiyanın başına Dağıstan vəhhabiləri gələrsə, bu, çətin ki, Qərbin xoşuna gəlsin, deyə Pol Qobl bildirib. -02D-