Sementə tələbat yerli istehsal hesabına təmin ediləcək

Yerli xammalla işləyən yeni müəssisələr sayəsində bir sıra malların idxalından asılılıq azalır. İlin sonu üçün sementə tələbat yerli istehsal hesabına təmin ediləcək. Bu barədə iqtisadiyyat və sənaye naziri Şahin Mustafayev bildirib.

Onun sözlərinə görə, ilin I yarısında tikinti materiallarının istehsalı 16,8 faiz, sement istehsalı isə 39 faiz artıb. Sumqayıt Kimya Sənaye Parkında və Balaxanı Sənaye Parkında ilk rezidentlər peyda olub. Sumqayıtda polad və polietilen boruların istehsalına başlanılıb, yüksək təzyiqə davamlı hidrotexniki avadanlıqların, polipropilen və yüksək sıxlıqlı polietilenin istehsalının təşkili işləri aparılır. Balaxanı Sənaye Parkında qeydiyyata alınmış rezident şirkətlər tərəfindən tullantı yağlarından 120 adda müxtəlif növ məhsul istehsalının və plastik məmulatların təkrar emalının təşkilinə başlanılıb.

Nazirin sözlərinə görə, Mingəçevir və Gəncə Sənaye parklarının yaradılması ilə bağlı da hüquqi bazanın formalaşdırılması məqsədilə müvafiq işlər görülür.

Ümumilikdə, 6 ayda qeyri-neft sənayesində məhsul istehsalı ötən ilin eyni dövrü ilə müqayisədə 4,2 faiz artıb.

İyulun 10-da Nazirlər Kabinetinin 2014-cü ilin birinci yarısının sosial-iqtisadi inkişafının yekunlarına və qarşıda duran vəzifələrə həsr olunmuş iclasında Şahin Mustafayev deyib ki, polad istehsalı kompleksinin yaradılması işi cədvələ uyğun gedir.

2014-cü il «Sənaye ili» elan edilib. Müstəqil ekspertlərin fikrincə, iqtisadiyyatın digər sahələri kimi, sənaye istehsalı da oliqarxların əlində cəmləşib. «Dövlət maşını» onların yolunu başqa sahibkarlardan təmizləyir.

«İqtisadi Təşəbbüslərə Yardım» İB-nin sədri Azər Mehdiyev Turan-a bidlirib ki, son illər gerçəkdən bir neçə sənaye müəssisəsi istismara verilib. «Problem ondadır ki, yerli mal peyda olanda analoji məhsulun idxalına məxfi qadağa və ya məhdudiyyət qoyulur. Bu, ÜTT-yə üzvlük ərəfəsində rəqabətin təmin edilməsi cəhətdən yanlış yanaşmadır», - deyə iqtisadçı bildirib. --08D--