Sənaye məhsulları istehsalı 0,9% artıb

2016-cı ilin yanvar-iyulunda Azərbaycanda sənaye məhsulları istehsalı 17,6 mlrd manat olub. Bu, ötən ilin eyni dövründəkindən 0,9% çoxdur, deyə Dövlətstatkom bildirir.

Neft sektorunda sənaye məhsulları istehsalı 0,7%, qeyri-neft sektorunda 2,6% artıb.

Sənaye məhsulları istehsalında hasilat sənayesinin payı 65,1%, artım 0,9% olub. Neft hasilatı 0,7% artıb, qaz hasilatı 8% azalıb.

Sənaye məhsulları istehsalında emal sənayesinin payı 28,6% olub. İlin əvvəlindən emal sənayesində 3,8% artım olub. Tütün məmulatlarının istehsalı 10,5 faiz, toxuculuq sənayesi məhsullarının istehsalı 2,8 dəfə, geyim istehsalı 9,6 faiz, metallurgiya sənayesi məhsullarının istehsalı 2,3 faiz, hazır metal məmulatlarının istehsalı 17,4 faiz və s artıb.

Bəzi sənaye məhsulları istehsalında azalma olub: içki istehsalı 12%, kimya malları 11,5%, rezin və plastmass məmulatlar 16,6%, tikinti materialları 21,3% və s azalıb.

Avqustun 10-da İsmayıllıda velosiped yığımı zavodunun açılışında prezident İlham Əliyev deyib ki, sənaye və kənd təsərrüfatı qarşıdakı illərdə iqtisadiyyatın şaxələndirilməsinin iki vacib istiqaməti olacaq. 08D