Sənaye və energetika naziri GDF SUEZ vitse-prezidentini qəbul edib

Azərbaycanın təqsdiqlənmiş qaz ehtiyatları 2,2 trln m3-dir. Bu, ölkəyə imkan verəcək ki, yaxın onilliklərdə beynəlxalq bazarlara vacib qaz tədarükçüsü olsun. Bu barədə sənaye və energetika naziri Natiq Əliyev dünən Fransanın GDF SUEZ şirkətinin vitse-prezidenti Jan Mari Doje (Jean Marie Dauger) ilə söhbətində bildirib.

O, qeyd edib ki, Azərbaycan qaz nəqli infrastrukturuna xeyli vəsait qoyub. 

Əliyev deyib ki, Azərbaycan Avropa üçün vacib tərəfdaşdır: "Enerji ehtiyatları rəqabət və toqquşmalara yox, regional və beynəlxalq əməkdaşlığın inkişafına xidmət etməlidir. Tədarükçü, tranzitçi və istehlakçıların maraqları üst-üstə düşməli və qarşılıqlı fayda verməlidir. Ölkəmizin və prezidentin enerji fəlsəfəsi belədir".

“Abşeron” strukturunda kəşfiyyat işləri zamanı qaz yatağı tapan Fransa şirkətlərinin uğurundan danışan nazir deyib ki, bu kəşf  həm Azərbaycanın enerji potensialını, həm də Avropanın enerji təhlükəsizliyini gücləndirəcək. 

Qeyd edək ki, GDF SUEZ Azərbaycanda təkcə “Abşeron” layihəsində təmsil olunub və 20% paya malikdir. O, layihəyə 2010-cu ilin iyinunda daxil olub, 2011-ci ilin sentyabrında yataq kəşf edilib. 2 iyul 2012-ci ildə layihənin operatoru Total “Abşeron” yatağının ehtiyatları barədə ilkin məlumat verib. Onun təkcə şimal hissəsinin çıxarıla biləcək ehtiyatları 150-300 mlrd m3-dir. 

Kondensat ehtiyatı barədə məlumat verilmir. ARDNŞ geoloqları onun 80 mln ton olduğunu bildirir. İlk kəşfiyyat quyusu 6874 metrdir. --12D—