Sığortalanan avtomobillərin vahid qiymətləndirmə cədvəli hazırlanır

 Azərbaycan Sığortaçılar Assosiasiyası avtomobillərin bazar qiymətini müəyyən etmək üçün vahid qiymətləndirmə cədvəli hazırlayır.

ASA rəhbəri Orxan Bayramov Turan-a bildirib ki, bu barədə qərar dekabrın 3-də sığorta şirkətlərinin avtomobil üzrə anderrayterlərinin və sığorta hadisələri şöbələrinin qiymətləndirmə üzrə mütəxəssislərinin iştirakı ilə görüşdə qəbul edilib.

Bu, sığortalanan avtomobilin növbəti illər üzrə qiyməti, sığorta tarifi və sığorta müqaviləsinə xitam verilərkən qaytarılacaq sığorta haqqı müəyyən olunarkən müştərilərlə sığortaçılar arasında anlaşılmazlığı aradan qaldıracaq. 

Cədvələ əsasən avtomobillərin istehsal olunduğu ölkə, marka və istehsal ilindən asılı olaraq onların bazar dəyəri müəyyən ediləcək. Yəni müəyyən edilmiş əmsallar (faiz göstəriciləri) əsasında hər bir maşının istehsalından neçə il keçməsindən asılı olaraq onun ilkin satış dəyərini nə qədər itirdiyi hesablanacaq. Beləliklə, işlənmiş avtomobillər sığortalanarkən sığorta məbləği və sığorta haqqı ilə bağlı mübahisələr aradan qalxmış olacaq.

Azərbaycanın sığorta şirkətləri 2014-cü ilin noyabrında avtonəqliyyat vasitələri sahiblərinin mülki məsuliyyətinin icbari sığortası üzrə 78,185 min müqavilə bağlayıb, 6,1 mln manat sığorta haqqı əldə ediblər. Bu dövrdə 1 017 tələb üzrə 1,2 mln manat ödəniş edilib. --17D—