Silk Way qrupunun daha bir şirkətinin kapitalının azaldığı elan edilib

“Silk Vey Development” MMC sentyabrın 12-də nizamnamə kapitalının 200 000 manata qədər azaldığını elan edib. Bu, “Silk Way Holding” MMC-nin son 5 gündə kapitalının azaldılmasına gedən ikinci şirkətidir.

Şirkət 2011-ci ildə 200 000 manat kapitalla təsis edilib. Sonrakı dövrdə kapital daha 8 mln 70 min manata artıb. Kommersiya hüquqi şəxslərin dövlət reyestrinə əsasən, “Silk Vey Development” şirkətinin təsisçisi Zaur Həsən oğlu Axundovdur, o həmçinin “Silk Way Holding” şirkətlər qrupunun prezidentidir.

Bu ilin aprel ayında “Riqa beynəlxalq hava limanı” səhmdar cəmiyyəti və “Silk Way Investment” şirkəti iki il ərzində 5,5 ha sahəsi olan yüklərin logistika mərkəzinin tikintisinə dair razılaşma imzalayıb. Latviya mətbuatı iddia edir ki, “Silk Way Investment” şirkəti bu layihəyə 40 mln avro investisiya yatırır.

Latviyanın müəssisələr registrinin məlumatına əsasən, “Silk Way Investment” şirkətinin kapitalının payının 100%-i Bakıda qeydiyyata alınan “Silk Way Development” MMC-yə məxsusdur.

Ötən həftə Silk Way Airlines MMC nizamnamə kapitalının 36,8 mln manatdan 24 mln 297,4 min manata qədər azaldılmasını elan etdi.

“Silk Way Holding” qrupuna Bakıda və ölkədən kənarda 20-dən çox şirkət daxildir. 08B