Siyəzən Broyler dəniz servis şirkətinin mülkiyyəti olub

“Siyəzən Broyler” ASC-nin İH-i 2014-cü ilin mayında ümumi yığıncaq keçirəcək. 2010-cu ilin sentyabrında Xəzərdə servis xidməti göstərən “Monolit-D Ltd” şirkəti bu fabrikin səhmlərinin 99,17%-i (3 556 6 66 ədəd) alıb. 

Məlumatlı mənbə Turan-a bildirib ki, investisiya öhdəliyi icra edildiyi üçün mülkiyyət hüququ firmaya keçib. QKDK-də bu məlumatı nə təsdiq, nə də təkzib ediblər. “Monolit-D Ltd” firmasında da məlumatı şərh etməyiblər və bildirilib ki, direktor S.Məmmədov ezamiyyətdədir. 

2010-cu ildə “Monolit-D Ltd” 3 ildə “Siyəzən Broyler”ə 16 230,6 min manat vəsait qoymaq öhdəliyi götürüb. Bu il müddət bitib. 

“Monolit-D Ltd” “Siyəzən Broyler” ASC-ni alan 4-cü şirkətdir. İlk dəfə 90-cı illərin sonunda onu “Mendor International” (Britaniya) və “Baku Group” (ABŞ) alıb. Öhdəliyə icra edilmədiyi üçün dövlət müqaviləni ləğv edib. Livanın “Ruby Rose Grouр S.A.R.L” şirkəti ilə 2006-cı ildə belə olub. Şirkət 2000-ci ildə fabrikin səhmlərinin 85%-i, minoritarlardan isə 14,17% səhm alıb. Məhkəmə öhdəliyə icra edilmədiyi ittihamı ilə müqaviləni ləğv edib. Halbuki “Ruby Rose” müəssisənin yenidən qurulmasına $35 mln vəsait qoymuşdu. 

“Siyəzən Broyler”in nizamnamə kapitalı 16,7 mln manatdır. Səhmdarları 75 fiziki və hüquqi şəxsdir. 

Fabrik 1985-ci ildə tikilib. Burda 1 315 nəfər işləyir. Gücü ildə 12 min ton ət, 15 mln yumurtadır. 2010-cu ildə burda 15 030 ton ət və 19,1 mln yumurta istehsal edilib. 

“Monolit-D Ltd” firması 1999-cu ildə yaradılıb və 4 gəmisi var.  --08B—