SOCAR ilin sonuna kimi «Günəşli» yatağındakı 10 saylı özüldə hasilatı bərpa edəcək

SOCAR 2016-cı ilin sonuna qədər “Günəşli” yatağındakı 10 saylı dəniz özülündə quyuları yanğından sonra təmir edərək istismara verməyə ümid edir. Bu barədə “ 2015-ci ilin texniki-iqtisadi göstəricilərinə dair hesabat müşavirəsi zamanı “Azneft” İstehsalat Birliyinin  baş direktor Daşqın İskəndərov bildirib.

SOCAR-ın mətbuat xidmətinin məlumatına görə, ilin sonuna kimi 10 saylı özüldəki quyuların təmir olunaraq istismara verilməsi nəzərdə tutulur.

Amma fevralın 10-da Londonda Petroleum Weekly konfransında SOCAR prezidenti Rövnəq Abdullayev demişdi ki,  10 saylı özüldə təmir mayın sonuna başa çatacaq.

Baş direktorun birinci müavini, baş mühəndis Balamirzə Ağarəhimov 2015-ci ilin neft-qaz hasilatı sahəsində görülmüş işlərdən, hasilatın sabitləşdirilməsi istiqamətində görülən tədbirlərdən, tətbiq edilən yeni texnologiyalardan söz açıb. Tədbirdə 2016-cı ildə qarşıda duran vəzifələr müəyyənləşdirilib.

Turan qeyd edir ki, “Azneft” İstehsalat Birliyi hələlik 2015-ci ilin yekunlarını açıqlamayıb.Ona görə məlum deyil, SOCAR strukturu ötən ilə necə yekun vurub. Amma SOCAR prezidenti Rövnəq Abdullayev əvvəllər jurnalistlərə bildirib ki, 2016-cı ildə neft hasilatı 500-600 min ton azala bilər.

“Günəşli” yatağındakı 10 saylı özüldə sutkada 1000 ton neft və 1 mln kubmetr qaz çıxarılırdı.

SOCAR-ın hesabatına əsasən, 2014-cü ildə “Azneft” İB 6 mln 817,1 min ton neft (artım 9,1 min ton) və 6 mlrd 399,9 mln kubmetr qaz (mənfi 173,9 mln kubmetr).  --12В--