Son məlumatlara görə, yanan platformadan 19 neftçi xilas edilib (VIDEO / YENİLƏNİB-2)

SOCAR-ın saat 14.00-a (13.00) olan son məlumatına görə, “Günəşli” dəniz yatağında yanan platformadan 19 nəfər xilas edilib.

Neftçilərin xilas edilməsi üzrə əməliyyat davam edir.

Maraqlıdır ki, hələ dünən SOCAR və onun şöbələrinin nümayəndələri platformadan bütün heyətin təxliyə edildiyini iddia edirdi. -0-

* * *

Yanğın baş verərkən platformada 63 nəfər işçi olub, onlardan 32 nəfəri hazırda xilas edilib. Qalanların xilas edilməsi davam etdirlir. Bu barədə Azərbaycan Dövlət Neft Şirkətində (ARDNŞ) yanğınla bağlı yaradılmış qərargahdan Turan-a bildiriblər.

ARDNŞ prezidenti Rövnəq Abdullayev hadisə yerinə gedib.

Hazırda xilasetmə əməliyyatları davam etdirlir. Hadisə yerində Fövqalədə Hallar Nazirliyinin helikopterləri də işləyir.

“Platformada yanğın davam edir. Dalğanın hündürlüyü 8-10 metrə çartır və bu səbədən yanğınsöndürən gəmilər platformaya yaxınlaşa bilmir”, deyə qərargahdan bildiriblər.

Xilasetmə işlər başa çatandan sonra ARDNŞ prezidentinin mətbuat konfransı olacaq. -03B-

2015 Dekabr 04 (Cümə) 20:53:40

Dəniz platformasında yanğın zamanı həlak olanlar və yaralananlar var.

Bəzi neftçilər xilasetmə işləri zamanı xilasedicilərin rezin qayığının yırtılması ilə əlaqədar batıb. Bu barədə neftçilərin doğmaları və yaxınları bildirir.

Həmçinin platformada partlayışdan və ondan sonra çıxan yanğından ziyan çəkənlərin olduğu haqqında təsdiq edilməmiş məlumat var.

Bundan başqa, oddan xilas olaraq qayıqlara enən neftçilərin bir hissəsi güclü soyuğa məruz qalıb.

Bu arada, qəzanın aradan qaldırılması üzrə qərargahdan Turan agentliyinə həlak olanlar haqqında məlumatı təkzib ediblər. Hazırda neftçilərin xilas edilməsinə FHN helikopterləri də qoşulub, onlar gəmilərdən fərqli olaraq, güclü küləkdə də işləyə bilir və neftçiləri troslarla çıxardır. -03В-

* * *

“Azneft” İstehsalat Birliyinin (Dövlət Neft Şirkətinin hasilatçı strukturu) 28 May adına Neft və Qaz Çıxarma İdarəsinin platformasında yanğın başlayıb. Bu xəbəri Turan-a NQÇİ-dəki nefçilərdən biri zəng edərək  bildirib.

Mənbənin sözlərinə görə, yanğın təqribən saat 18 radələrində 10 N-li hasilat platformasında başlayıb. Yanğının nədən törənməsi bilinmir, ancaq hasilat kəskin meteroloji hava şəraitində aparılırmış.

Zərər çəkmişlər haqda dəqiq məlumat yoxdur.

Turan-a SOCAR-dakı məlumatlı mənbə də qəza hadisəsini təsdiqləyib.

Qeyd edək ki, 10 N-li platforma dayazsulu “Günəşli” yatağında yerləşir. SOCAR-ın hasilatının 60%-dən çoxu bu yatağın payına düşür. —12B--