Su xətləri yeni, standartlarsa köhnədir

“Azərsu”Səhmdar Cəmiyyətinin mətbuat xidmətinin  məlumatına görə, 2015-ci ildə Bakı şəhəri və Abşeron yarımadasında, eləcə də ölkənin 29 şəhər və rayon mərkəzində  həyata keçirilən layihələr nəticəsində 200 min nəfərinin içməli su ilə təchizatı yaxşılaşdırılıb, 186 min nəfər ilk dəfə mərkəzləşdirilmiş qaydada içməli su ilə təmin olunub, 102 min nəfərin su təchizatı fasiləsiz rejimə keçirilib. Bununla da ölkə əhalisinin 64,5, Bakı şəhərinin isə 79,2 faizə fasiləsiz su ilə təmin olinur.

ASC-nin məlumatına görə, 2015-ci ildə Kürdəxanı qəsəbəsində yeni su təchizatı sistemlərinin yenidən qurulması layihəsinin icrası başa çatıb, Badamdar və Nardaran qəsəbələrində yeni layihələrin icrasına başlanılıb. Hesabat ilində 14 km-lik Bayıl-Bibiheybət-Lökbatan kanalizasiya tuneli tikilib, Lökbatan çirkab su təmizləyici qurğular kompleksinin ərazisində yeni nasos stansiyası quraşdırılıb. 2015-ci ildə Astara, Daşkəsən, Tərtər və Qobustan şəhərlərində su təchizatı və kanalizasiya sistemlərinin yenidən qurulmasına başlanılıb. Ucarda yeni su təchizatı, Göyçayda isə su təchizatı və kanalizasiya sistemləri istismara verilib. Mingəçevirdə məhsuldarlığı sutkada 55 min kubmetr olan sutəmizləyici qurğusu inşa olunun. Şəmkir şəhərinin içməli su təchizatının yaxşılaşdırılması məqsədilə 16,5 km uzunluğunda Şəmkirçay-Şəmkir magistral su kəməri  istismara verilib. Ötən il Kürdəmir, Ucar, Yevlax, Yardımlı, Zaqatala, Füzuli, Tovuz, Quba, Şəmkir, Şəki, Beyləqan rayonlarının 66 min nəfər sakini olan 29 kəndində içməli su təchizatı yaxşılaşdırılıb.

Mətbuat xidməti bildirir ki, hesabat dövründə 866 km içməli su, 285 km kanalizasiya xətləri çəkilib, 35 su anbarı, 12 su və kanalizasiya nasos stansiyası tikilib, 6 subartezian quyusu qazılıb, 52 mini smart tipli olmaqla 80 mindən çox su sayğacı quraşdırılıb. İl ərzində istehlakçılara 289 milyon kubmetr su satılıb, 192 milyon kubmetr həcmində kanalizasiya xidmətləri göstərilib. Göstərilən xidmətlər üzrə yığım səviyyəsi 2,4 faiz artaraq 93,6 faizə yüksəlib, abonent sayı 56 min artaraq 1 milyon 377 minə çatıb.

Ölkədə əhalinin su ilə təchizatını yaxşılaşdırmaq üçün son illər bir çox layihələr həyata keçirilirr. Bu layihələr  işməli suyun keyfiyyəti necə, dəyişirmi?

İqtisadi Təşəbbüslərə Yardım İctimai Birliyinin (İTYİB) eksperti Samir Əliyev bildirir ki,Azərbaycan müstəqillik qazandıqdan sonra bir sıra milli standart və normativlər qəbul edilsə də içməli suyun keyfiyyəti ilə bağlı köhnə sovet standartı saxlanılıb. Yalnız qablaşdırılmış sular üçün texniki şərtlər qəbul edilib. Milli standartların qəbuluna məsul dövlət qurumu olan Standartlaşdırma, Metrologiya və Patent üzrə Dövlət Komitəsi 2010-cu ilin iyul ayında Codex Alimentarius Komissiyasına (Codex Alimentarius Commission) üzv olub və ölkə standartlarını beynəlxalq standartlara çatdırmaq öhdəliyi götürüb. Amma bu günə qədər həmin standartlar müəyyələşdirilməyib. İTYİB 2011-ci ildə Avropa Komissiyası və OXFAM təşkilatının dəstəyilə Azərbaycanda içməli suyun keyfiyyətini və suya əlçatanlılığı tənzimləyən standartlarla bağlı tədqiqatlar aparmışdı. S.Əliyev Dünya Səhiyyə Təşkilatının suya əlçatanlıqla bağlı tövsiyələrinin hələ də yerinə yetirilmədiyinin bildirir.