Sumqayıtda yerləşən müəssisələrə məlumat turu təşkil edilib

İqtisadiyyat və Sənaye Nazirliyi iyulun 3-də «Sənaye ili»ndə KİV təmsilçiləri üçün ilk məlumat turu təşkil edib.

Jurnalistlər əvvəlcə “Gilan” Tekstil Parkında olmuşlar. Müəssisə 2012-ci ildə fəaliyyətə başlayıb, 8 fabrik və 3 istehsal xəttindən ibarətdir. Parkın ərazisində yerləşən 3 fabrikin tikintisinə Sahibkarlığa Kömək Milli Fondu 15 milyon manat güzəştli kredit ayırıb. “Gilan” Tekstil Parkında istehsal edilən məhsullar “GİLTEX” markası ilə Rusiya, Ukrayna və Gürcüstana ixrac edilir.

Məlumat turu çərçivəsində KİV nümayəndələri Sumqayıt Kimya Sənaye Parkında da olublar. Parkın fəaliyyəti üçün 295,5 ha sahə ayrılıb. Ərazi 2 hissədən - inzibati-sosial və sənaye zonalarından ibarətdir. Sənaye Parkının ərazisində orta hesabla 35-40 müəssisənin yerləşdirilməsi nəzərdə tutulur. Burada 10 minə yaxın iş yerinin açılması gözlənilir. KİV təmsilçiləri “Azertexnolayn” və “SOCAR Polymer”də olublar. Sumqayıt Kimya Sənaye Parkının rezidentləri 7 il müddətinə mənfəət, torpaq, əmlak vergilərindən, eləcə də parka istehsal məqsədilə gətirilən avadanlıq və texnologiyalar əlavə dəyər vergisindən azaddır.

 KİV nümayəndələri “Azərsun Sənaye Parkı”nda fəaliyyət göstərən Yağ Emalı Fabrikində də olublar. Burada mətbuat nümayəndələrinə məlumat verilib ki, zavodun inşasında dövlətin güzəştli kreditlərindən də istifadə edilib. Məhsulun əsas hissəsi ixrac edilir.

Sumqayıtdan başqa Gəncə və Mingəçevirdə də sənaye zonaları yaratmaq məsələsinə baxılır. 08D