TAP qaz kəməri üzrə hökumətlərarası saziş 13 fevralda imzalanacaq

13 fevral 2013-cü ildə  Afinada Yunanıstan, İtaliya və Albaniya Transadriatik qaz kəmərinin (Trans Adriatic Pipeline, TAP) tikintisinə dair hökumətlərarası saziş imzalayacaq.

Bu barədə Yunanıstanın xarici işlər naziri Dimitris Avramopulos bəyan edib, deyə RİA Novosti agentliyi məlumat verir. 

Qarşıdakı əqd barədə Münhen təhlükəsizlik konfransının kuluarlarında Azərbaycanın xarici işlər naziri Elmar Məmmədyarovla görüşdən sonra bəyan edilib.

TAP boru kəməri layihəsi “Şahdəniz” yatağının (ehtiyatı 1,2 trln m3) işlənməsinin “Mərhələ-2” layihəsi çərçivəsində Azərbaycan qazının Avropaya çatdırılması üçün tikiləcək. Layihə çərçivəsində hasilata 2018-ci ildə başlanacağı gözlənilir. İldə hasil edilən 16 mlrd m3 qazdan 10 mlrd Avropaya nəql ediləcək. 

TAP Yunanıstan ərazisi ilə 478 km – Komotini şəhərindən şimal-şərqə uzanacaq, Albaniyanı keçib (209 km) Adriatik dənizinin dibi ilə (105 km) İtaliyanın cənubunda Brindizi limanına çatacaq. Hazırda layihənin səhmdarları «Axpo» (42,5%), «Statoil» (42,5%) və «E.ON Ruhrgas» (15%) şirkətləridir.

Yunanıstan, İtaliya və Albaniya ilə danışıqlar hələ başa çatmayıb, deyə Yunanıstan XİN-ə istinadən Afina xəbərlər agentliyi bildirib. İmzalanma mərasimində Azərbaycan hökumətinin nümayəndələrinin də iştirakı gözlənilir. --0—