Təkcə burjuaziyanın yox, əlillərin də gəlirləri artır

2012-ci ilin 11 ayında Azərbaycanda əhalinin gəlirləri 29,9 milyard manata çatıb. Bu,  ilin eyni dövrü ilə müqayisədə 13,7 faiz  çoxdur. Bu vəsaitlərin çox hissəsi (7,8 mlrd manat və ya 26,1%) kapital yığımı və bank əmanətlərinə yönəldilib, deyə Dövlətstatkomda düşünürlər. 

DSk-ya görə bu il adambaşına gəlirlər orta hesabla 296 manat 40 qəpik olub. Aydınlıq üçün deyək ki, əhalinin yarıdan çoxu iqtisadi cəhətdən aktiv deyil və orta aylıq əmək haqqı 390 manatdır. Bundan başqa, orta pensiya 140 manat təşkil edir, 500 min nəfər ünvanlı yardım alır, onların gəlirləri ayda 85 manatı keçmir.  DSK-da hesab edirlər ki, kapital artımına yönəldilən vəsaitləri burjuaziyanın aktivinə yazmaq olmaz. Maraqlıdır ki, ölkədə varlı və imkanlı adamların statistikası aparılmır, hələ rəsmən heç kəs milyoner olduğunu etiraf etməyib. Kiminsə vergiləri ödəməsi barədə informasiyalar məxfidir. DSK-da deyiblər ki, kapital artımına yönəldilən vəsaitlər hesablananda əlillərə pulsuz verilən mənzil və evlər, valyuta alışı, qiymətli kağızlarla əməliyyatlar da hesablanır. 

Dövlətstatkomun məlumatına görə, ilin əvvəlindən əhalinin gəlirlərinin 64,0 faizi son istehlaka yönəldilib. Vətəndaşlar gəlirlərin 8,3 faizini vergilər, sosial sığorta və üzvlük haqlarınına (həmkarlar ittifaqları və s.) xərcləyiblər. Daha 1,6 faiz kreditlər üzrə faizlərin ödənilməsi üçün istifadə edilib. 08D