Trazit yük daşımaları azalıb

Bu ilin yanvar-aprelində TRACECA nəqliyyat dəhlizi ilə Azərbaycan ərazisindən 3 mln 490,5 min ton uük daşınıb. Bu, ötən ilin ilk 4 ayındakından 19% azdır, deyə Dövlətstatkomda Turan-a bildiriblər.

Tranzit yüklərin 1 167,1 min tonu dəmir yolunun payına düşür. Bu, ötən ilin eyni dövründəkindən 26,4% azdır. «Azərbaycan Xəzər Dəniz Gəmiçiliyi» “Şərq-Qərb” marşrutu ilə 2 323,4 min ton yük daşıyıb. Daşımaların həcmi 14,6% azalıb.

Sifarişlər 19% azalsa da, nəqliyyatçıların yük daşımalarından gəlirləri 2,7% azalıb və 41 mln 816,6 min manat təşkil edib. Bunun 26,3 mln manatı  (+2,7%) dənizçilərin payına düşür.

Avropa-Qafqaz-Asiya (TRACECA) dəhlizi layihəsi həyata keçiriləndən Azərbaycan ərazisindən maksimal yük daşımaları həcmi 2003-cü ildə olub – 8 mln 284 min ton. Sonrakı illərdə yük daşımaları azalıb, 2011-ci ildə isə 7,8 mln tona artıb.   

Azərbaycan son illər tranzit imkanlarını artırır. Buraxılış qabiliyyəti 15 mln  ton maye və 10 mln ton quru yük olan Bakı Dəniz Limanı, Beynəlxalq Aeroportun yeni aerovağzalı tikilib. İlin sonu üçün Bakı-Tbilisi-Qars dəmir yolu xətti istismara verilməlidir. Bu marşrut ilə Avropadan Çinə və əks istiqamətdə beynəlxalq yüklər daşınacaq.

TRACECA layihəsini Avropa İttifaqı maliyyələşdirir. 08B