Vergi mədaxili 9,2% azalıb

İlin I rübündə Vergilər Nazirliyi 1,6 mlrd manat yığıb. Bu, 2014-cü ilin eyni dövründəkindən 9,2% azdır.

Vergilər Nazirliyinin məlumatına görə, qeyri-neft sektorundan vergi mədaxili 3 ayda 1 mlrd 55,7 min manat olub. Bu, 2014-cü ilin eyni dövründəkindən 78,5 mln manat və ya 8% çoxdur. Vergilərin strukturunda qeyri-neft sektorunun payı 66% olub. Bu, 2014-cü ilin eyni dövründəkindən 10,6% çoxdur.

Qeyd edək ki, Maliyyə Nazirliyi bir gün əvvəl dövlət büdcəsinin icrası barədə operativ məlumat yayıb. Ona əsasən,  Vergilər Nazirliyi dövlət büdcəsinə 1 mlrd 594,8 mln manat təmin edib. Bunun 1 mlrd 51,6 mln manatı  qeyri-neft sektorunun payına düşür. Beləliklə, Vergilər Nazirliyi və Maliyyə Nazirliyinin rəqəmləri arasında fərq var.

İqtisadçı Rövşən Ağayev qeyri-neft sektorundan vergi mədaxilinin artım həcmini məqbul saymır. «Məlumdur ki, bu ildən hökumət bir sıra vergi növləri üzrə rejimi sərtləşdirib. Sahibkarlıq subyektləri üzərində nəzarət yoxlamalar yolu ilə gücləndirilib. Hökumətin özəl sektorun inkişafı barədə bəyanatlarına baxmayaraq, vergi həcmi yüksək deyil», deyə ekspert qeyd edib.

Azərbaycanda gizli iqtisadiyyatın səviyyəsi yüksək olaraq qalır. Bir çox ərzaq və qeyri-ərzaq mallarının istehsal həcmi, otel biznesi və ictimai iaşə və s dövriyyəsi barədə göstəricilər ehtimal etməyə imkan verir ki, vergi potensialı tam həcmdə reallaşdırılmır. Bir çox sahibkarlar bildirir ki, onların real vergi yükü dövlət büdcəsinə köçürüləndən çoxdur.  08B