Vergilər Nazirliyi 50 yeni xidməti avtomobil alıb

Vergilər Nazirliyi vergi ödəyicilərinə xidmət mərkəzləri üçün Fiat Doblo markalı 50 yeni xidməti avtomobil alıb. Fevral ayının 18-də Nazirliyin inzibati binasının qarşısında vergi ödəyicilərinə xidmət mərkəzlərinin nümayəndələrinə xüsusi nəqliyyat vasitələrinin təqdim edilməsi ilə bağlı tədbir keçirilib, deyə qurumun mətbuat xidməti bildirir. 

Avtomobillər “bu avtomobillər vergi orqanları tərəfindən göstərilən xidmətlərin bu xidmətlərin istehlakçılarına daha da yaxınlaşdırılması, onların insanlar üçün daha rahat və əlçatan olmasının təmin edilməsi, xidmət tədbirlərinin vergi orqanlarının nəzarət dairəsinə aid olan bütün rayonları, qəsəbə və kəndləri əhatə etməsi, vergi təbliğatının ünvanlı şəkildə aparılması məqsədilə” alınıb, deyə nazirlik məlumat verir. Avtomobillərin üzərində Vergilər Nazirliyinin atributları (Nazirliyin adı, loqosu, internet saytının rəsmi ünvanı) habelə “195 Çağrı Mərkəzi” sözləri yerləşdirilib. 

Vergilər Nazirliyinin Dövlət Vergi Müfəttişliyi İdarəsinin keçmiş rəisi Əliabbas Rüstəmov Turan-a bildirib ki, avtomobilləri alınması əməkdaşların işini yüngülləşdirmək üçündür.  Praktikada necə olacağını zaman göstərəcək. «Reallıq belədir ki, vergi xidməti sahibkarlara təzyiq funksiyasını icra edir. Nazirlik könüllü vergi ödənişi işi aparmır, bütün qanuni və qanunsuz metodlarla vergi yığır», deyə Rüstəmov qeyd edib.     

Cəmi 40 vergi ödəyicilərinə xidmət mərkəzi var, bunun 4-ü Bakıdadır. 2013-cü ildə  Vergilər Nazirliyi avtomobil almağa 889 750 manat xərcləyib. 

Nazirlər Kabinetinin 18 iyul 2011-ci il tarixli qərarına əsasən, Vergilər Nazirliyinin 83 xidməti avtomobili var. Bunun 15-i mərkəzi aparata, 3-ü nazirlik yanında orqanlara, 65-i regional strukturlara xidmət edir. 08B