Vergilər Nazirliyi nöqsanlar üzərində işləyəcək

İyulun 27-də Vergilər Nazirliyində Nazirlər Kabinetinin bu yaxınlarda keçirilmiş, İlham Əliyevin sahibkarlarla münasibətdə vergi orqanlarının fəaliyyətini tənqid etdiyi iclasına həsr olunmuş kollegiya iclası keçirilib.

Vergilər Nazirliyinin Analitik İnformasiya şöbəsinin məlumatına görə, nazir Fazil Məmmədov bildirib ki, nöqsanların aradan qaldırılmasına yönəlmiş ciddi tədbirlər görülür.

Sahibkarların fəaliyyətinə süni maneələr yaradılmasının və qanunsuz müdaxilənin yolverilməz olduğunu qeyd edən vergilər naziri vətəndaşlardan daxil olan ərizələrə və şikayətlərə daha diqqətlə baxılmasının, işində nöqsana yol vermiş vergi xidməti orqanının əməkdaşı barəsində ciddi tədbirlər görülməsinin əhəmiyyətini qeyd edib, deyə idarənin məlumatında bildirilir.

Maraqlıdır ki, Vergilər Nazirliyinin gösərdiyi statistikaya inansaq, onda, məsələn, bu ilin aprel ayında idarəyə daxil olan 9000-dən çox müraciətdən cəmi 2,5%-i şikayət xarakteri daşıyıb, o cümlədən 0,2% korrupsiya, 0,5% vergi orqanları əməkdaşlarının fəaliyyəti və ya fəaliyyətsizliyi ilə bağlı.

Xatırladaq ki, dövlət başçısı faktiki olaraq Vergilər Nazirliyinin əməkdaşları tərəfindən yol verilən bəzi hüquqpozmaları açıqlayıb. “Mənə bildirirlər ki, son vaxtlar Vergilər Nazirliyi çox sərt, tələbkar davranır. Amma heç bir əsassız tələblər irəli sürülməməlidir. Bunu qeyd etməliyəm. Buna görə sahibkarlar, sadə dildə desək, dövlətin pulunu 100 faiz ödəməlidirlər, vəssəlam. Bundan başqa onlar heç kimə bir manat belə ödəməməlidir”, deyə İlham Əliyev bildirib. O, həmçinin dövlət qurumlarına heç bir əsassız tələblər irəli sürməmək göstərişi verib. “Vergilər Nazirliyi, hüquq-mühafizə orqanları, Bakıda və rayonlarda yerli icra hakimiyyəti ödəniş müəyyən edir, pay istəyir, “himayə edir”. Bu, dözülməz haldır, buna son qoyulmalıdır. Onlar hesab edirlərsə ki, bunu heç kim bilmir, yanılırlar. Bu, çox ciddi məsələdir və mənə bəzi yerlərdə bunun kütləvi xarakter aldığı haqqında siqnallar daxil olur”, deyə ölkə prezidenti iyulun 13-də qeyd edib. 08D