Vergilər Nazirliyinin inzibati binasının tikintisinə daha 132,12 mln manat

Vergilər Nazirliyi “Renaissance Construction Azerbaijan” MMC ilə Bakı şəhəri, Heydər Əliyev prospekti 105 ilə Müzəffər Nərimanov küçəsinin kəsişməsində yerləşən torpaq sahəsində 31 mərtəbəli inzibati binasının tikinti işlərinin satın alınması barədə müqavilə imzalayıb.

Satınalmalar üzrə Dövlət Agentliyinin məlumatına görə, müqavilənin qiyməti 132 mln 121 min 681,9 manatdır.

Əvvəllər KİV yazırdı ki, Vergilər Nazirliyinin inzibati binasının hündürlüyü 176 m olacaq.

Maraqlıdır ki, bu, Vergilər Nazirliyi ilə “Renaissance Construction Azerbaijan” MMC arasında ictimaiyyətə məlum olan ikinci müqavilədir. İlin əvvəlində nazirlik məlumat vermişdi ki, bu subyektlər arasında Vergilər Nazirliyinin inzibati binasının ikinci mərhələsinin tikintisi üzrə müqavilə bağlanılıb (http://goo.gl/ukUzKT). Müqavilənin qiyməti 18 mln 499 min 719 manat idi. 2013-cü ildə  Vergilər Nazirliyi “Aikon Cpit” MMC ilə bu layihə üzrə 20 mln 796 min 670 manat məbləğində müqavilə bağlayıb.

 “Renaissance Construction Azerbaijan” MMC “Synergy Group” ASC qrupuna daxildir. Onu 2010-cu ildə “Synergy Construction” ilə “REC ULUSLARARASI İNŞAAT YATIRIM SANAYİ VE TİCARET A. S” ( “Renaissance Construction”un törəməsi, “Renaissance Holding”ə daxildir, Ankara/Türkiyə) təsis edib. Tərəflərin pay iştirakı bərabərdir. BM-nin nizamnamə kapitalı $1,2 mln-dır. 08B