Vüqar Bayramlı: Parklanma qiyməti əsassız yuksəldilib

Nəqliyyatı İntellektual İdarəetmə Mərkəzi (NIIM) Bakı şəhər İH-ə paytaxtda 288 müvəqqəti parklanma yeri yaratmaq barədə təklif göndərib. Bu barədə NİİM mətbuat xidmətinə istinadən rəsmi mətbuat bildirib.

Qaydasız parklanma ilə mübarizə prezident İlham Əliyevin Nazirlər Kabinetinin iclasındakı iradından sonra yenidən güclənib.

İqtisadi və Sosial İnkişaf Mərkəzinin sədri Vüqar Bayramlının sözlərinə görə, qanunsuz parklanan avtomobillərin mərkəzi küçələrdən yığışdırılması tıxac probelmini azaldıb. Amma bu problemin iqtisadi səbəbi var.

"Məsələ burasındadır ki, mərkəzdəki yeraltı dayanacaqlarda qiymətlər yüksəkdir və əhalinin ödəniş qabiliyyətinə uyğun deyil. 22 gün gündə 8 saat çalışan vətəndaş parklanmaya 70-90 manat xərcləməli olur. Buraya şənbə və bazarı da əlavə etsək, məbləğ 10 manatı keçir. Bu isə orta əmək haqqının ¼-dir", - deyə Bayramlı bildirib.

O, hesab edir ki, parkinqin 1-ci saatı 30 qəpiyə endirilməlidir. Bundan başqa, işi ilə bağlı mərkəzdə dayanacaqlardan istifadə edənlərə güzəşt tətbiq edilməli, pulsuz parklanma müddətini 30 dəqiqəyə endirmək, aylıq və həftəlik kartlara keçmək lazımdır.

Şəhərin mərkəzində bir sıra yeraltı dayanacaqlar var. Onların ikisi böyükdür. Biri Heydər Əliyev sarayının arxasındadır və eyni vaxta 4,5 min avtomobil qəbul edə bilir, digəri Azadlıq meydanının altındadır və  1760 yeri var. Parklanmanın ilk saatı 1 manat,  2-5 saat 2 manat, 5-12 saat 3 manat, 12-24 saat 6 manatdır. Heydər Əliyev sarayının arxasında abunə qiyməti gündə 12 saat üçün ayda 60 manatdır.

Mərkəzdəki başqa yeraltı və çoxmərtəbəli dayanacaqlarda qiymətlər yüksəkdir.

Bir müddətdir hətta sahiblərinin yaşayış yerinin yanında saxlanılan avtomobilləri belə cərimə meydançasına aparırlar. Bu məsələdə Almaniya nümunəsi Azərbaycan üçün örnək ola bilər. Bu ölkədə qeydiyyatda olduğun evinin yanında maşın saxlamaq üçün 20 avro verib xüsusi yarlık alırsan və maşını saxlamaq hüququn təsdiq edilmiş olur. Bir ildən sonra yarlık-qəbzin müddəti uzadılır. Aydındır ki, 20 avroya. Müfəttişlər hər gün evlərin yanında parklanan avtomobilləri yoxlayır. Yarlık olmayanda avtomobil sahibi 40 avro cərimə edilir. --15B—