![Açiq mənbələrdən foto.](https://turan.az/resized/media/2022/main/052600045894-750-500-resize.webp)
Açiq mənbələrdən foto.
Xarici İşlər Nazirliyindəki korrupsiya qalmaqalında ortaq olan şəxs yenidən dövlət satınalmalarında favoritdir
Bakı/26.05.22/ Turan: Mərkəzi Nəbatat Bağı mayın 17-də “Turbo Servis” MMC ilə 12 ay ərzində yaşıllaşdırma, müxtəlif növ ağacların alınması və əkilməsi işlərinin həyata keçirilməsini nəzərdə tutan müqavilənin bağlandığını elan edib. Bu şirkətin direktoru Xarici İşlər Nazirliyinin məmurları tərəfindən satınalma prosedurlarında xüsusilə böyük miqyasda vəsaitlərin mənimsənilməsi ilə bağlı korrupsiya qalmaqalında şərik olub.
Vahid Dövlət Elektron Satınalmaları Portalının yaydığı məlumata görə, Mərkəzi Nəbatat Bağında 1700 m2-ə yaxın daş döşəmə örtüyü dəyişdiriləcək, 11784 ədəd meyvə və bəzək ağacları əkiləcək. Bu məqsədlər üçün 99 879 manat (58,7 min dollar) vəsait ayrılıb.
Bu ilin may ayında “Turbo Servis” şirkəti Laçın rayon İcra Nümayəndəliyi ilə Qayğı qəsəbəsində yolun işıqlandırılması üçün malların alınması və xidmətlərin göstərilməsi üzrə müqavilə bağlayıb. Müqavilənin dəyəri 48240 manatdır.
“Turbo Servis”in direktoru 34 yaşlı İmişli rayon sakini Xaqani Zalovdur. 2021-ci ildə başa çatan məhkəmə prosesində Xaqani Zalov, eləcə də Xarici İşlər Nazirliyinin mal tədarükçülərinin digər qanuni nümayəndələri saxta satınalma prosedurlarında iştirak etdiklərini etiraf ediblər. Onların adına açılan şirkətlər tenderlərin qalibi elan edilib. Məsələn, Xaqani Zalovun rəhbərlik etdiyi “Kuryer Təchizat” MMC 2017-ci ildə Xarici İşlər Nazirliyi ilə dəftərxana ləvazimatı və təsərrüfat mallarının tədarükünə dair 164,7 min manat (96,8 min ABŞ dolları) məbləğində müqavilə imzalayıb. Bu məbləğ nazirliyin vəzifəli şəxslərinə geri qaytarılıb, şirkət direktoru isə müqavilə məbləğinin 2%-ni almaq hüququna malik olub. Etiraflara baxmayaraq, nə X.Zalov, nə də Xarici İşlər Nazirliyinin tədarükçülərinin digər nümayəndələri cinayət və ya başqa məsuliyyətə cəlb edilməyib.
Dövlət Vergi Xidmətindən verilən məlumata görə, 13 fevral 2017-ci il tarixində Xaqani Zalovun iştirakı ilə 5 manat kapitalla 5 şirkət yaradılıb. Onlardan ikisinin (“Vespa Təchizat” MMC və “Golden Luks” MMC) dövlət büdcəsinə müvafiq olaraq 8990 və 13080 manat borcu var.
Xatırladaq ki, bu il mayın 5-də prezident İlham Əliyevin sərəncamı ilə Mərkəzi Nəbatat Bağı Azərbaycan Milli Elmlər Akademiyasının strukturundan çıxarılaraq Bakı Şəhər İcra Hakimiyyətinin tabeliyinə verilib. Həmin sənədlə Bakı şəhərində Mərkəzi Nəbatat Bağının abadlaşdırılması, yenidən qurulması və tikintisinə 25 milyon manat (14,7 milyon ABŞ dolları) ayrılıb. 08B
-
- Cəmiyyət
- 26 May 2022 16:19
İqtisadiyyat
-
İqtisadiyyat Nazirliyində yerli istehsalın stimullaşdırılması və ixrac potensialının genişləndirilməsi yollarının araşdırılması məqsədilə iyulun 26-da qeyri-neft sənayesi sahibkarları ilə görüş keçirilib.
-
Azərbaycanın internet provayderləri “Aztelekom” və “Baktelekom” avqustun 15-də qiymət strukturunda böyük dəyişikliklər edəcək. Yeni tariflərə əsasən, minimum internet sürəti 100 Mbit/s-dək artacaq, Mbit/s-nin qiyməti 0,45 AZN-dən 0,25 AZN-ə enəcək. Müvafiq olaraq, ödəniş 100 Mbit/s üçün 25 AZN, 150 Mbit/s üçün 30 AZN, 250 Mbit/s üçün 36 AZN-ə uyğunlaşdırılacaq.
-
Müstəqil ekspertlər Azərbaycanın ticarət dövriyyəsinin və ödəniş profisitinin azalması səbəbindən öz valyutası manatın növbəti devalvasiyası ərəfəsində ola biləcəyini ehtimal edirlər. Gözlənilən iqtisadi düzəlişlər valyuta axınının azalması və neft hasilatının azalması fonunda baş verir.
-
Azərbaycanın Xarici İşlər Naziri Ceyhun Bayramov bu gün Azərbaycan Xarici İşlər Nazirliyində Somalinin Xarici İşlər və Beynəlxalq Əməkdaşlıq Naziri Əhməd Moallim Figi ilə görüşüb. Bu görüş, əvvəlki gün Figi ilə Azərbaycanın İqtisadiyyat Naziri Mikail Cabbarov arasında keçirilmiş müzakirələrdən sonra baş tutub.
Rəy yaz