Baş tutmayan denasifikasiya planı bir il və ya daha uzun müddət öncə hazırmış

***

Putinin ideyasını aydınlaşdıran, yoxsa denasifikasiya planının müəllifi?

V.Putini Ukraynanın denasifikasiyası və demilitarizasiysı planının ideoloqu və icraçısı hesab edirlər. Amma Putin bu şüarı  (orada başqa maddələr də var) Ukraynaya qarşı müharibənin ilk günü (24 fevral 2022-ci il) elan edərkən onun denasifikasiya (demilitarizasiya aydındır - düşmənin ordusunun və hərbi infrastrukturunun məhv edilməsi) anlayışının mexanizmini izah etməyib. Aydın izahın olmaması Kremlin təbliğatçılarını Rusiya prezidentinin nitqi barədə düşünməyə vadar edib. Qeyd edək ki, Putinin mətbuat katibi Peskov “planın tam həcmdə yerinə yetiriləcəyini” təkrarlamağa məcbur olub, baxmayaraq ki, Putin ordunu Kiyev, Çernovits, Sum vilayətlərindən çıxarmaq məcburiyyətində qalıb.

Putin ideologiyasının müəllifliyi məsələsi bu günlərdə Timofey Sergeysevin (filosof, metodoloq, “Russiya Seqodnya” BMQ Zinovyev klubunun üzvü) Rusiyanın “RİA Novosti” dövlət informasiya agentliyində dərc olunmuş məqaləsində açıqlanıb. Nəşrdən məlum olur ki, Ukraynada fəaliyyət planı ilk dəfə Sergeysev və ya onu irəli sürən hansısa Rusiya qurumu tərəfindən Ukraynada müharibənin başlanmasından təxminən bir il öncə - 10.04.2021-ci ildə "Hansı Ukrayna bizə lazım deyil" məqaləsində yazılıb.

O vaxt Timofey Sergeysev yazıb: "Ukrayna Donbasında miqyaslı hərbi münaqişənin başlaması ehtimalı daha da artır. Cəlb edilmiş iştirakçıların hərəkətləri və ritorikası vəziyyətin hərbi xarakterini daha çox göstərir. Mövcudluğuna hələ də yolverilən Ukrayna birmənalı şəkildə neytral və federativ (konfederativ) olmalı, həm daxili, həm də xarici rusofobiyadan əl çəkməlidir (məcbur olacaq).

Sergeysev Putinin tələblərindən sitat gətirib:

- biz Ukrayna Donbasının zorla əzilməsinə imkan verməyəcəyik; 

- hücum cəhdi olarsa, Ukrayna nominal dövləti ləğv ediləcək;

- əkcə Ukrayna deyil, SSRİ-nin dağılması zamanı Rusiyadan ayrılan formal müstəqil "respublikalar"ın heç biri Rusiyaya ziyan vurmaq üçün Qərbdən istifadə edə bilməz.     

Kreml “RİA Novosti"də ukraynalıları “faşist” kimi müəyyən edib

Daha sonra S. Sergeysev Ukraynada faşizm haqda iddianı ("Ukraynada əhalinin sosial təşkilatmasının faşist xarakteri şübhə doğurmur" - Sergeysev) özünəməxsus şəkildə əsaslandırıb və belə bir fikir səsləndirib: "Belə nasist birliyinin ləğvi təkcə onun rəhbərliyinin zirvəsini kəsməyi yox, həm də nasistləşdirilmiş xalqın özünü nasist təsirindən, nasist ideologiyasına və praktikasına cəlb edilməkdən təmizləməyi tələb edir".

Müəllif M. S. Qriqoryev və D. V. Sablinin "Adi faşizm. Ukrayna hərbi cinayətləri və insan hüquqlarının pozulması (2017-2020)" kitabına diqqət çəkərək, rusiyalı təbliğatçılara istinad edir.

Ukraynada nasizm ideyasının əsaslandırılması üçün Hitlerçilərin əsərlərindən istifadə olunur. Müəllif yazır ki, Ukrayna cəmiyyətinin siyasi, hüquqi və təhsil sisteminə nüfuz etmiş “Ukrayna irqçilik doktrinası" təkcə yəhudi və qaraçı soyqırımını yox, həm də rus və digər xalqların sağ qalanların əbədi köləyə çevrilməsilə soyqırımını nəzərdə tutan Qobino-Rozenberq-Hitler irqçilik doktrinasından heç bir şəkildə geri qalmır.

Bir il öncə Sergeysev məqalənin təsviri hissəsindən konkret təkliflərə keçərək “RİA Novosti” oxucularına bildirib: “Donbasda hücum olarsa, 2008-ci ildə Gürcüstan Silahlı Qüvvələrinə qarşı analoji əməliyyatlar kimi Ukraynaya sülhə məcburetmə metodlarının tətbiqi yetərli olmayacaq”.

O, ukraynalılara İkinci Dünya Müharibəsindən sonra icra edilmiş müharibəni uduzmuş Almaniya əhalisinin denasifikasiyası üzrə Amerika planının tətbiqini təklif edir.

Cəzadan və kənarlaşdırmadan tutmuş lüstrasiya və dərsliklərin təmizlənməsinə qədər

Bir il öncə Sergeysev yazıb: "Aniterror əməliyyatı adlanan təşkilatda könüllü iştirak etmiş bütün şəxslər, onun keçirilməsini açıq şəkildə dəstəkləyənlər və haqq qazandıranlar, mahiyyətcə desək, müvafiq kateqoriyalar üzrə hərbi cinayətkarlar (Almaniyada bunlar əsas cinayətkarlar, cinayətkarlar, az günahkarlar, bələdçilər idi) dövlət, siyasi, hüquqi, təhsil funksiyalarının icrasından kənarlaşdırılmalı və cəzalandırılmalıdır. Ehtimal olunan üstünlük, tarixi faktların qəsdən təhrif edilməsi, ədavət, təhqir, alçaltma və nifrət ruhunda yolverilməz qiymətləndirmələrin əlamətlərinə görə irqi doktrinanın elementləri kimi tövsif edilən bütün materiallar (konsepsiyalar, dərsliklər, ədəbiyyat, filmlər və s.) təhsil və mədəniyyət siyasəti proqramlarından çıxarılmalıdır. Hərbi təcavüzdə, Ukrayna nasizminin təbliğində və irəliləməsində bu və ya digər şəkildə iştirak etmiş bütün təşkilatları qadağan etmək və buraxmaq lazımdır".

"Rusiya Ukrayna ilə nə etməlidir" - həmin Kreml ideoloqunun Ukraynaya hücumdan bir həftə sonra - 03.04.2022-ci ildə "RİA Novosti"də dərc edilmiş ikinci məqaləsi belə adlanır. 

Bu məqalədə Sergeysev, müharibənin ilk günündə Putinin Ukrayna ilə bağlı planının bir neçə bəndini açıqlarkən söyləmədiyi hər şeyi açıqlayır. Əlbəttə ki, döyüşmüş və ya müqavimətdə bir şəkildə iştirak etmiş bütün ukraynalıların (müəllif onları nasistlər adlandırır və s.) total məhvindən sonra izah edir: “Total lüstrasiya aparılmalıdır. Özünü nasizm ilə əlaqələndirən istənilən təşkilat ləğv və qadağan edilməlidir.  Lakin yuxarı ilə yanaşı, xalq kütləsinin passiv nasist olan, nasizmin əlaltısı olan mühüm hissəsi də  günahkardır.  Onlar nasist hakimiyyətini dəstəkləyiblər, ona rəvac veriblər. Əhalinin bu hissəsinin ədalətli cəzalandırılması mülki şəxslərə münasibətdə mümkün qədər ehtiyatlı və diqqətli aparılan nasist sisteminə qarşı ədalətli müharibənin labüd çətinliklərini daşımaqla mümkündür. Bu əhali kütləsinin sonrakı denasifikasiyası yenidən tərbiyədən ibarətdir ki, bu da nasist qaydalarının ideoloji repressiyası (yatırılması) və ciddi senzura ilə əldə edilir: təkcə siyasi sferada yox, həm də mütləq mədəniyyət və təhsil sferasında.

Ukraynaya Ukrayna, ukraynalılara isə ukraynalı olmaq qadağandır

Sonra Sergeysev qəti şəkildə belə bir postulat irəli sürür: "Denasifikasiya edilmiş ölkə suveren ola bilməz. Denasifikasiya edən dövlət - Rusiya - denasifikasiya ilə bağlı liberal yanaşmadan çıxış edə bilməz. Denafikator ideologiyası denasifikasiyaya məruz qalan günahkar tərəflə mübahisələndirə bilməz".

Ukraynada təmizləmənin müvəqqəti çərçivələri müəyyən edilib: “Denasifikasiyanın müddəti bir nəsildən az ola bilməz, onlar denasifikasiya şəraitində doğulmalı, böyüməli və yetkinləşməlidir”.

O, yaradacaqlarının adını da müəyyən edib: “Ukrayna” adı, görünür, nasist rejimindən azad edilmiş ərazidə tam denasifikasiya edilmiş hər hansı dövlət quruluşunun adı kimi saxlanıla bilməz... Yeni denasifikasiya edilmiş respublikalarda denasifikasiya aləti sayılan kadrlar və təşkilatlar Rusiyanın birbaşa güc və təşkilati dəstəyinə arxalana bilməz...Denasifikasiyanın həm də deukraynalaşdırma – hələ sovet hakimiyyəti tərəfindən başlamış tarixi Malorossiya və Novorossiya ərazilərində əhalinin özünüidentifikasiyası etnik komponentinin miqyaslı olaraq süni şəkildə şişirdilməsindən imtina – olması qaçılmaz olacaq..Tarix göstərdi ki, Gürcüstandan və Baltikyanı ölkələrdən fərqli olaraq, Ukrayna milli dövlət kimi mümkün deyil, bunu "qurmaq" cəhdləri isə qanunauyğun olaraq nasizmə gətirib çıxarır".

Kremlin əsarətində olan ərazilərdə əhalinin gələcəyi Rusiyanın dövlət təşkilatlarının göstərişilə xırdalıqlara qədər yazılıb, dəyişdirilmiş ukraynalılarla bağlı öhdəliklər yer alıb: "Nasist elementlərindən təmizlənmiş yerli özünüidarəetmə, milis və müdafiə orqanlarının təşkili, onların bazasında yeni respublika dövlətçiliyinin əsasını qoyan proseslərin başlanması, bu dövlətçiliyin Ukraynanın denasifikasiyası üzrə Rusiya qurumu (yeni yaradılmış və ya dəyişdirilmiş, məsələn, “Rossotrudniçestvo”dan) ilə sıx əməkdaşlığa inteqrasiyası, denasifikasiya üzrə respublika normativ basazının (qanunvericiliyin) Rusiyanın nəzarəti altına qəbul edilməsi, sərhədlərin və azad edilmiş ərazidə denasifikasiya sahəsində Rusiya hüququnun və Rusiya yurisdiksiyasının birbaşa tətbiqi çərçivələrinin müəyyən edilməsi".

Raşizm rus irqçiliyinin növüdür

Sergeysev öz epopeyasının Ukrayna hissəsini bu sözlərlə yekunlaşdırır: “Ukraynanın denasifikasiyası üzrə Rusiyanın müttəfiqləri olmayacaq. Çünki bu, sırf rus işidir”.

Müharibədən bir il öncə və Putinin Ukraynaya qarşı müharibəsinin ilk həftəsində Rusiya dövlət informasiya agentliyində dərc edilmiş iki məqalə 2022-ci ildə Ukraynada baş verənlərin konseptuallığını və düşünülmüş olmasına şübhə yeri qoymur. Rusiya Federasiyasının təcavüzü Ukraynada baş verən hansısa hadisələrə spontan cavab deyil (“NATO-ya daxil olacaq, ruslara qarşı ayrı-seçkilik edirlər” və s.). 2021-ci ilin əvvəlində Kremldə təcavüz planının hazırlanmasına başlanılıb və Timofey Sergeysev bunun açıq ifadəçisi olub.

Kremlin ideoloqu bir il fərqlə iki məqalədə açıq şəkildə rusları inkişafca ukraynalılardan yüksəkdə tutur, hətta yazır ki, ukraynalılar öz dövlətini qurmağa qadir deyil. Ukraynaya Ukrayna olaraq qalmağı, ukraynalılara isə ukraynalı olmağı qadağan edir. Almaniyalı deputat Sergeysevin məqalələrini rasizm ideologiyasının yayılması hesab edir. Almaniya məhkəməsinə də "denasifikasiya"nın müəllifinin barəsində qanuni hökm çıxarmaq qalır.