Putinin “Rus dünyası” göz önündə yox olur

Belarus prezidentinin necə qeyb olduğunu gördünüzmü? Hər gün Putinə əllərini uzadaraq nəsə danışan Lukaşenko barmağını qaldırdı, narazılıqla başını yellədi və teleekranlardan yox oldu, halbuki ki, Moskva televiziyası onu göstərməyə hər zaman hazırdır.

Lukaşenkonun ruh halını başa düşürəm: 4-5 gün öncə, yəni Putin əməliyyatının "Belarus istiqaməti" Rusiyanın diqqət mərkəzində idi, bir şeylər həll edirdi, ancaq indi bu istiqamət, sadəcə, yoxdur.

Əgər məlum olarsa ki, Londondan və ya Vaşinqtondan Lukaşenko ilə sakitcə danışıqlar aparıblar və o da başını yuxarı-aşağı yelləyib, heç kim təəccüblənməz. Biz Avrasiya qitəsinin Minskdən çıxan göbəyinin həmin ajiotajını, hisslərini görmürük.

Bu gün Ukrayna KİV-i Rusiya qoşunlarının 30 yaşayış məntəqəsindən çıxarması və Ukraynanın Donetsk vilayəti ərazisində yenidən qruplaşması barədə məlumat verib. Ukrayna Silahlı Qüvvələrinin bombaladığı Belqorod yanacaq-sürtkü materialları anbarı yanır. Diqqət edin, Belqorod Rusiyanın şəhəridir, Ukraynanın yaxınlığında eyniadlı vilayətin mərkəzidir. Mərkəzi Asiyadan açıqlama gəldi. Qazaxıstan - Kremlçilərin fikrincə, xalqın qəzəbindən qurtulduğu üçün təşəkkür əlaməti olaraq onların ayaqları altında sürünməli olan ölkə (Belarusda olduğu kimi) bu gün bildirib ki, ABŞ və Aİ-nin Rusiyaya qarşı sanksiyalarından yan keçmək üçün alət olmayacaq. Bu barədə Qazaxıstan Prezident Administrasiyası rəhbərinin birinci müavini Timur Suleymenov “Euractiv” xəbər portalına müsahibəsində bildirib.

"Biz sanksiyalara əməl edəcəyik. Baxmayaraq ki, biz Rusiya, Belarus və digər ölkələrlə iqtisadi birliyin tərkib hissəsiyik, biz həm də beynəlxalq birliyin bir hissəsiyik. Ona görə ABŞ və Aİ-nin təkrar sanksiyalarının Qazaxıstana tətbiq olunması ən son istədiyimiz şeydir", - RİA Novosti Süleymenevdən sitat gətirib.

Gürcüstan Rusiyaya qarşı bütün beynəlxalq sanksiyalarda iştirak edir, Gürcüstan prezidenti Salome Zurabişvili CNN telekanalının efirində bildirib. Yerevan KİV-in bir hissəsi Ermənistanın Azərbaycana məğlubiyyətindən sonra hələ də davam edən milli erməni fəlakəti şəraitində Rusiyanı ittiham edir. Paşinyan Ukraynaya qarşı "əməliyyat"ı dəstəklədiyini bildirməyib.

Moskva televiziyasında hər gün Kremlin Çin və Hindistan tərəfindən dəstəkləndiyinə işarə edirlər, Lavrov isə artıq Dehlidədir və bu ölkənin baş naziri ilə görüşür. Lakin fakt ondan ibarətdir ki, Pekin və Dehli birmənalı şəkildə, heç bir müzakirə və istisna olmadan Ukraynanın ərazi bütövlüyünün tərəfdarıdır. Dünyanın heç bir ölkəsi Krımı Rusiyanın ərazisi kimi tanımayıb (Vanuatu və bu tip adalar haqda məlumatım yoxdursa, üzr istəyirəm).

Dehli və Pekin Rusiyaya qarşı sanksiyaların qeyri-effektivliyindən,  mono və ikiqütblü dünyanın mümkünsüzlüyündən danışa bilər, lakin Krımı Ukraynanınkı hesab edirlər və müvafiq olaraq Donetsk və Luqanskla bağlı mövqenin dəyişəcəyinə Moskvanın ümidi yoxdur.

Türkiyə Ukraynaya "Bayraktar"ları göndərməkdə davam edir, Rusiyanın Ukraynada "Bayraktar"ların məhv ediləcəyinə olan ümidi puça çıxdı. Rusiyanın qanuni sərhədlərindən kənara genişlənməsi Türkiyəyə lazım deyil, heç kimə lazım deyil.

“Pervıy” kanalda verilişində növbəti siyasi çıxışçı Ukraynaya münasibətinə görə Azərbaycan haqda pis şeylər deməyə başlamışdı ki, Skabeyeva tez onun sözünü kəsdi və xatırlatdı ki, tanınmış bir moskvalı tənqidçinin Azərbaycanla problemləri olmuşdu və Bakı onu beynəlxalq axtarışa verdi. Studiyadakı digər iştirakçılar da anlayışla gülümsədilər.

Rusiya sıxılır və bu, Rusiya Federasiyası Silahlı Qüvvələrinin Ukraynada yerləşmə coğrafiyasından aydın görünür. London, Almaniya və digər ölkələrdən yeni, daha effektli öldürücü silahların tədarükü yaxındadır, onların daşınması üçün ağır texnika tələb olunmur.

Qərbin göndərə biləcəyi və Ukrayna ordusuna lazım olan da məhz budur. Zelenskinin hərbi təlim keçmiş və yüksək motivasiyalı canlı hərbi qüvvə çatışmazlığı yoxdur. Kiyevin minimum beş milyon döyüş qabiliyyətli əhalisi ilə yanaşı, digər ölkələrdən də iyirmi minə yaxın könüllüsü var.

Eyni zamanda, Rusiyada "əməliyyat"a ictimai dəstək artıb. Bu barədə yeni sosial sorğulardan məlum olur. Putin xarici antirusiya destruktiv mexanizmləri işə salıb, ancaq daxili dağıdıcı prosesləri də işə salıb, belə ki, geri çəkimək indi onun üçün çətindir, çünki sonra hərbi və siyasi geri çəkilmənin səbəblərini uzun və yüksək səslə açıqlamalı olacaq. İrəli getməyə isə güc yoxdur (yoxsa geri çəkilmək əmrini niyə verdi?).

Gözlərimiz önündə Kremlin Ukraynaya tələblərinin sayının azalması və təbliğat yorumlarında onların dəyişməsi baş verir. Rusiyalı politoloqlar Ukrayna ərazisində Rusiya ordusunun olmadığı halda Ukraynanın “denasifikasiyası”nın mümkünlüyünü izah etmək üçün söz axtarışında öz fantaziyalarına baş vurmalı olurlar. Eynilə Ukraynanın əks-hücum edən ordusu ilə bu ölkənin “demilitarizasiyası”.

Skabeyevanın, Solovyovun ətrafında dayanan və digər aparıcı siyasi teleproqramlardakı üzlərə baxın. Aparıcıların qrimasına, dəvət olunmuş ekspertlərin kədərli-skeptik təbəssümlərinə, onların nitqindəki söyüşün dərəcələrinə diqqət yetirin və sizə çox şey aydın olacaq.