2021-ci büdcə layihələri Milli Məclisə təqdim olunub

Bakı/21.12.20/Turan: 2021-ci il dövlət və icmal büdcənin layihələri Milli Məclisə təqdim olunub.

Bu barədə Maliyyə Nazirliyi məlumat yayıb.

Məlumatda qeyd olunur ki, dövlət büdcəsi layihəsinin əsas xüsusiyyəti azad edilmiş ərazilərdə bərpa və yenidənqurma işləri, sosial, iqtisadi, enerji, kommunal xidmətlər, nəqliyyat infrastrukturlarının yaradılması, torpaqlarına qayıdacaq vətəndaşların yaşaması və işgüzar fəaliyyəti üçün şərait yaradılmasıdır.

Layihəyə əsasən, 2021-ci il dövlət büdcəsinin gəlirləri 25 mlrd 427 milyon manat nəzərdə tutulur ki, bu da ÜDM-in 33,6 faizidir. 2020-ci ilin proqnozu ilə müqayisədə dövlət büdcəsinin gəlirləri 1 mlrd 303 milyon manat və yaxud 5,4 faiz çoxdur.

2021-ci il dövlət büdcəsinin xərcləri 28 mlrd 543 milyon manat (ÜDM-də xüsusi çəkisi 37,7 faiz) proqnozlaşdırılır ki, bu da 2020-ci ilə nisbətən 1 mlrd 50,8 milyon manat və ya 3,8 faiz çoxdur.

2021-ci il icmal büdcəsinin gəlirləri 23828,1 milyon manat (2020-ci illə müqayisədə 1465,1 milyon manat və ya 6,6 faiz çox), xərcləri 31 mlrd 163,4 milyon manat (2020-ci illə müqayisədə 855,1 milyon manat və ya 2,8 faiz çox) proqnozlaşdırılır.

Proqnozlaşdırılan büdcə kəsiri ÜDM-in 9,7% -ni təşkil edəcək ki, bu da 2020-ci il büdcə kəsirindən 1,4% azdır. –71D-