AMB ərazi idarələrinin sayını 2 dəfə azaldır

Azərbaycan Mərkəzi Bankı (AMB) bu ilin sonunda ərazi idarələrinin sayını 2 dəfə azaltmağa qərar verib.

Bu barədə qurumun internet səhifəsində bildirilir.

AMB qərarını biznes proseslərin optimallaşdırılması ilə izah edib. Beləliklə, qurumun Gəncə və Quba Regional Mərkəzlərinin, Sumqayıt Şəhər İdarəsinin fəaliyyətinə xitam verilməsi nəzərdə tutulur, Yevlax Ehtiyat Mərkəzi, Biləsuvar Regional Mərkəzi və  Naxçıvan MR idarəsi isə fəaiyyətini davam etdirəcək.

“Bu qərar yerli bankların nağd pulun logistikası üzrə regional infrastrukturunun inkişafı, bu infrastruktur vasitəsilə müvafiq regionlarda nağd pula olan tələbin ödənilməsi və biznes proseslərin effektivliyinin artırılması ilə əlaqədardır. Gəncə Regional Mərkəzində xidmət olunan banklara və milli poçt operatoruna AMB-nin Yevlax Ehtiyat Mərkəzində, Quba Regional Mərkəzi və Sumqayıt Şəhər İdarəsində xidmət olunan banklara və milli poçt operatoruna isə AMB-nin Bakı şəhəri, Nəsimi rayonu, Rəşid Behbudov küçəsi, 90 və Nərimanov rayonu, Əliyar Əliyev küçəsi, 10 ünvanlarında yerləşən inzibati binalarında xidmət göstəriləcək”, - deyə AMB bəyan edib.

Qurum həmçinin vətəndaşlara tədavülə yararsız milli pul nişanlarının dəyişdirilməsi, köhnə nümunəli milli pul nişanlarının yeni nümunəli pul nişanlarına dəyişdirilməsi, pul nişanlarının ekspertizaya qəbulu, yubiley və xatirə pul nişanlarının satışı ilə bağlı Bakı şəhəri, Səbail rayonu, Bülbül prospekti, 27 ünvanındakı inzibati binasına, eləcə də Yevlax, Biləsuvar və Naxçıvandakı ofislərinə müraciət etməyi məsləhət görüb.