Abşeron qəsəbəsinin memarlığı " müsabiqəsində layihələr seçilib

Bakı/11.01.21/Turan: Bakı Şəhər Memarlıq və Şəhərsalma Baş İdarəsi "Abşeron qəsəbəsinin memarlığı" müsabiqəsinin birinci mərhələsinin qaliblərini elan edib.

İndiki mərhələdə üç qəsəbə üzrə ən yaxşı memarlıq həlləri seçilib: Ramana, Pirşağı və Əmircan.

Müsabiqə Bakı Şəhər Memarlıq və Şəhərsalma Baş İdarəsinin təşəbbüsü ilə Azərbaycan Memarlar İttifaqı və "Bakı Abadlıq Xidməti" MMC tərəfindən keçirilir.

Ümumi mükafat fondu 60 min manat olan müsabiqədə iştirak etmək üçün 53 layihə təqdim olunub.

Əmircan qəsəbəsi üzrə qalib elan edilmiş layihədə mövcud infrastruktur problemləri araşdırılıb və həllinə dair təkliflər irəli sürülüb. Qəsəbənin tarixinə, yerli ənənəvi memarlığa xas olan faktorların qabardılması və ətraf mühitlə həmahəng inkişaf ideyaları üzərində qurulmuş layihədə mövcud tikililərin fasad həlləri ilə yanaşı məkanın xarici turistlər üçün cəlbediciliyinin daha da artırılması, turizm infrastrukturunun və turist marşrutlarının təkmilləşdirilməsi təklif edilib.

Pirşağı qəsəbəsi üzrə layihədə ictimai məkanların qıtlığı probleminin aradan qaldırılması üçün həm dalan içi məhəllələr, həm də mərkəzi küçələr boyu dəyişikliklərlə həllinə dair təkliflər öz əksini tapıb. Həmçinin layihədə avtomobillərin dominantlığının həlli məqsədi ilə yolların quruluş sxemində piyada və velosiped zolaqlarının əlavə olunması təklif edilib.

Ramana üzrə qalib gəlmiş layihədə ilk növbədə qəsəbənin özünəməxsus tarixini ön plana çıxarmaq məqsədilə qala ətrafı əraziyə fokuslanıb. Sakinlərin gündəlik rifahını yaxşılaşdırmaq, ənənəvi məişət həyatını əks etdirmək üçün mövcud qeyri-yaşayış obyektlərinin bərpası üçün məkana uyğun rəng və memarlıq elementləri seçilib.

Münsiflər Heyətinin qərarı ilə hər qəsəbə üzrə seçilmiş 4 layihənin müəlliflərinə pul mukafatlarının verilməsi nəzərdə tutulub. 1-ci yerin sahibi 10000 manat, 2-ci yerin sahibi 5000 manat, 3-cü yerin sahibləri (iki yer) hər biri 2500 manat mükafat alacaq.

Digər iştirakçılara həvəsləndirici hədiyyələr və iştirakçı sertifikatları təqdim ediləcək. Seçilmiş layihələr və onların müəllifləri haqqında daha ətraflı məlumatlawww.absheronsimasi.az saytında tanış olmaq mümkündür.06D-