“Bəziləri ad qoyub gedir, bəziləri də dərin iz qoyub gedir”: Ağa Mehdiyevin yaradıcılığına hörmət

Bakı/11.09.23/Turan:  8 sentyabr  Yarat incəsənət məkanında “Rəəsamın gözü ilə“  layihəsi çərçivəsində Xalq rəssamı Ağa Mehdiyevin yaradıcılığı ilə bağlı müzakirə  keçirilib. Müzakirədə sənətşünas, qalerist, mentor, ekspert, "Contemporary Baku" şirkətinin təsisçisi , direktoru Qalib Qasımov və  sənətşünaslıq üzrə fəlsəfə doktoru Könül Əzimova rəssamın yaradıcılığı ilə bağlı araşdırmalarını, analitik yanaşmalarını və xatirələrini paylaşıblar. Tədbirin moderatoru  kurator, sənətşünas Məhbarə Abbasova idi.

Müzakirə zamanı Ağa Mehdiyevin həyat və yaradıcılığı müzakirə olunub. Müzakirəyə gələn qonaqlar arasında Ağa Mehdiyevin digər ailə üzvləri də iştirak edib.  Mehbarə Abbaasova Ağa Mehdiyevin Lahıcla bağlı və ümumi təbiət mənzərələrinin kifayət qədər müasir olduğunu qeyd edib. Müzakirədə  rəssamın hazırda yetərli dəyəri görməməsi dəfələrlə vurğulanıb.

 Qalib Qasımov Ağa Mehdiyevin əsərlərində daha çox sadəliyin və milli koloritin üstünlük təşkil etdiyini  qeyd edib. Onun sözlərinə görə  Ağa Mehdiyevin yaradıcılığında milli əşyalar daha çox gözə çarpır. Müzakirə zamanı rəssamın dostları ilə münasibəti haqqında da danışılıb. Qızlarının sözlərinə görə rəssam Kamil Əliyevlə yaxın dost olub. Ümumiyyətlə Ağa Mehdiyevin dostlarına və ətrafına qarşı münasibətinin də çox yaxşı olduğu qeyd olunub.

“Rəssamın əsərlərində heç bir siyasi və ya sosial problemlər yer almayıb. O öz sadəliyi və özünə məxsusluğu ilə iz qoyub”. – Qalib Qasımov

Könül Əzimova rəssamın müxtəlif janrlarda əsərlərinin olduğunu vurğulayıb. Onun sözlərinə görə  rəssam dövrünün kifayət qədər yaxşı rəssamlarından olub. Müzakirənin ilk hissələrində rəssamın portret əsərləri haqqında danışılıb. Könül Əzimova Məhəmməd Əmin Rəsulzadənin ilk portretini Ağa mehdiyevin çəkdiyini vurğulayıb. Bundan başqa rəssam Heydər Əliyev və s kimi bir çox insanın portretini çəkib. O öz yaxın dostlarına da portretlər hədiyyə edib. Könül əzimova rəssamın avto-portretlərinin də olduğunu qeyd edib.

Qalib Qasımov avto-portret hazırlamağın çox çətin olduğunu vurğulayıb. Çünki avto-portret hazırlayarkən rəssam daxili və xarici məni ilə qarşılaşır. İkisini harmoniyada yaratmaq isə kifayət qədər çətindir.

Müzakirə zamanı Ağa Mehdiyevin əsərləri arxa fonda slayd formasında nümayiş olunurdu. Bundan əlavə müzakirənin orta hissələrində bir çox məşhur rəssamın və Ağa Mehdiyevin dostlarının onunla bağlı fikirlərindən ibarət video çarx da nümayiş olunub.

Müzakirədə müasir izləyicinin Ağa Mehdiyevin əsərlərinə yanaşmasıda müzakirə mövzularından olub. Könül Əzimova hazırda rəssamın işlərinin yetərli dəyəri görməməsindən şikayətlənib. Onun sözlərinə görə rəssamla eyni dövrdə yaşayıb yaratmış digər rəssamların  bir çox işləri dərsliklərə salınıb amma Ağa Mehdiyevin əsərlərinə heç yerdə yer verilməyib. Könül Əzimovanın sözlərinə görə hazırda Ağa Mehdiyev heç də layiq olduğu dəyəri görmür.

Qalib Qasımov bunun bir çox səbəbi olduğunu vurğulayıb.  Əsas səbəb olaraq vikipedia və bir çox mənbələrdə rəssam haqqında bir çox məlumatın yarımçıq və ya yalnış olmasında görüb. Onun sözlərinə görə kifayət qədər və düzgün formada təbliğatın aparılmaması da buna səbəblərdən biridirib. Misal olaraq, Qalib Qasımov fərdi sərgilərinin sayının mənbələrdə düzgün qeyd olunmadığını vurğulayıb.

Müzakirədə rəssamın kitab qrafikalarından da söhbət açılıb:

“Yeni yaradıcılığa başlayanda onun bir çox kitab qrafikaları olub. Amma təəəssüf ki, onlardan heç biri bu günə qədər gəlib çatmayıb”.-Könül Əzimova

Ailədə Gülər Mehdiyeva, Azər Ələkbərov, Yaqub Mehdiyev kimi bir neçə davamçı olduğu qeyd olunub. Əlavə olaraq Könül hazırda ailədə olan gənclərin dövrün tələblərinə uyğun olaraq daha çox texniki sahələrə müraciət etdiklərini vurğulayıb.

Müzakirədə keçmiş rəssamların hazırda gündəmə gətirilməməsi mövzusuna da toxulub. Qalib Qasımov bununla bağlı xarici təcrübələrdən nümunə çəkib. Qalib Qasımov Polşada keçirilən rəqəmsal “Van Qoq” sərgisindən nümunələr söyləyib.

Müzakirədə rəssamın əsərlərində olan qadın obrazlarından da danışılıb. Qalib Qasımov rəssamın qadınlara əsərlərində dəyər verdiyini vurğulayıb. Qızları Ağa Mehdiyevin qadınlara xüsusi yanaşmasını qeyd edib. Tədbirin sonunda qızlarından biri Ağa Mehdiyevin həyat yoldaşına qarşı və ümumiyyətlə insanlara, vətəninə münasibəti haqqında bir neçə dəqiqə danışıb.

 “Anam atamın ona bir çırtma belə vurmadığını deyəndə və münasibətləri haqqında danışanda mən bir daha onlar arasında olan sevgiyə heyran qaldım”.

Sonda ailə üzvləri Ağa Mehdiyevə olan diqqət üçün qonaqlara və tədbir təşkilatşılarına təşəkkürlərini bildiriblər.

Qeyd edək ki, Ağa mehdiyevin əsərləri  19 may tarixindən “Çəhrayı- Qara” qrup sərgisi daxilində Yarat incəsənət məkanında nümayiş olunmağa başlayıb. Sərgi hələ də davam edir. Sərginin kuratoru Fərəh Ələkbərlidir.