16 mərtəbəli binada yanğının səbəblərinin araşdırılması üzrə dövlət komissiyası yaradılıb(YENİLƏNİB)

İlham Əliyevin sərəncamı ilə Bakı şəhəri Binəqədi rayonu Azadlıq prospekti, 200/36 ünvanında yerləşən çoxmərtəbəli yaşayış binasında baş vermiş faciənin səbəblərini araşdırmaq üçün dövlət komissiyası yaradılıb.

Baş nazirin müavini Abid Şərifovun rəhbərlik etdiyi komissiyaya DİN, FHN, MTN, Səhiyyə Nazirliyi, Maliyyə Nazirliyi, Əmək Nazirliyi rəhbərləri, habelə baş prokuror və Bakı meri daxil olub.

Komissiyaya yanğının səbəblərini araşdırmaq, habelə onun nəticələrinin aradan qaldırılması üzrə təxirəsalınmaz tədbirlər həyata keçirmək tapşırılıb.

Komissiya 15 gündə vətəndaşlara dəymiş ziyanı hesablamalı, zərərçəkmişlərə və həlak olanların ailələrinə maddi və digər yardım göstərilməlidir.

Komissiyaya həmçinin zərərçəkmişlərin müalicəsi üzrə tədbirləri təmin etmək və binanın yaşayış üçün yararlılığını qiymətləndirmək, sakinləri müvəqqəti mənzillərlə təmin etmək tapşırılıb.

Baş Prokurorluq, DİN və FHN-ə yanğının səbəblərini araşdırmaq və təqsirkarları məsuliyyətə cəlb etmək tapşırılıb. -06D-

2015 May 19 (Çərşənbə axşamı) 17:05:04

Binəqədi rayonunda insan qurbanları verilməsinə səbəb olmuş böyük yanğın dövlət başçısının ciddi narahatlığına səbəb olub. Bu barədə prezidentin ictimai-siyasi məsələlər üzrə köməkçisi Əli Həsənov mətbuata bildirib.

Prezident müvafiq orqanlara zərərçəkmişlərə hərtərəfli yardım göstərməyi tapşırıb.

Əliyev bugünki yanğının və paytaxtın Xətai rayonunda bir ay yarım əvvəl baş vermiş yanğının səbəblərinin araşdırılması üzrə komissiya yaratmağı tapşırıb.

“Üzləmə materiallarına sertifikat verilməsi məsələləri, onlardan yaşayış binaları üçün istifadəyə icazə olub-olmaması da araşdırılacaq.

Pozuntulara yol vermiş qurumlar və şəxslər ciddi şəkildə cəzalandırılacaq. Sözügedən materialla üzlənmiş binalarla bağlı müvafiq tədbirlər görüləcək”, deyə Həsənov bildirib.

Prezident həlak olanların ailələrinə dərin başsağlığı verib. Onların dəfn və yas mərasimləri dövlət hesabına həyata keçiriləcək, bu məsələlərin həlli Bakı meriyasına tapşırılıb.

Belə halların təkrarlanmasından uzaq olmaq üçün bütün zəruri tədbirlər görüləcək, deyə Əli Həsənov bildirib. -06D-