ABŞ: Azərbaycan təyyarəsinin qəzaya uğramasına görə Rusiya məsuliyyət daşıya bilər

ABŞ-ın yeni məlumatları göstərir ki, Azərbaycanın Qazaxıstanda qəzaya uğramış sərnişin təyyarəsini Rusiyanın hava hücumundan müdafiə sistemi vura bilərdi, - Turan-ın Vaşinqton müxbiri adlarının açıqlanmasını istəməyən iki amerikalı məmura istinadən bildirib.

"Biz dekabrın 25-də Rusiyanın hava hücumundan müdafiə sisteminin "Azərbaycan Hava Yolları"nın təyyarəsini vura biləcəyinə dair əlamətləri gördük", - ABŞ-ın yüksək vəzifəli məmuru jurnalistlərə bildirib. Lakin o, detalları, o cümlədən hava hücumundan müdafiə sisteminin adını açıqlamayıb.

"Bu, sadəcə, ilkin məlumatlardır, ancaq əlavə məlumat olacaq", - digər məmur Turan-ın müxbirinə bildirib.

Məmurlar həmçinin qeyd ediblər ki, fəlakət Ukraynanın Rusiyanın cənubuna pilotsuz təyyarələr buraxmasından qısa müddət sonra baş verib. Bəlkə də bu, Rusiyanın hava hücumundan müdafiə sisteminin istəmədən təyyarəni vurmasına səbəb olub. Nəticədə ən azı 38 nəfər həlak olub.