ABŞ Azərbaycanla Ermənistan arasında sülh danışıqlarının təşkilini davam etdirəcək

Bazar ertəsi ABŞ bəyan edib ki, Azərbaycan və Ermənistan arasında sülh danışıqlarını davam etdirəcək.

"Biz, şübhəsiz ki, bu məsələ üzrə dialoqun davam etdirilməsini dəstəkləyirik", - brifinq zamanı Dövlət Departamentinin rəsmi nümayəndəsi Metyü Miller Bakı və Yerevan arasında danışıqların cari vəziyyətilə bağlı Turan-ın sualının cavabında bildirib.

"Biz hesab edirik ki, bu, münaqişənin davamlı dayandırılmasına nail olmanın ən yaxşı yoludur və biz buna nail olmağa davam edəcəyik",- Miller deyib.

Ötən ilin payızından Vaşinqton Ermənistan və Azərbaycan xarici işlər nazirlərinin görüşlərinin növbəti raundunu keçirməyə çalışır, lakin bu, mümkün olmur. Yanvar ayında Vaşinqtonda belə görüşə müəyyən ümid vardı, amma o da baş tutmadı.

Bu arada, sərhədlərin delimitasiyası üzrə  ikitərəfli komissiya sərhəddə vasitəçilərsiz görüşməyə davam edir,  delimitasiya məsələlərini müzakirə edir. Bu görüşlər sülh müqaviləsinin bağlanması üzrə danışıqlar çərçivəsində keçirilir, lakin mühüm irəliləyiş yoxdur.

Millerin şərhləri dövlət katibi Entoni Blinkenin  təhlükəsizlik üzrə illik sammitdə iştirak etmək üçün Münhenə getdiyi vaxtda səslənib. Tədbirə Azərbaycan və Ermənistan liderlərinin də qoşulacağı gözlənilir. Ötən il onlar orada Blinkenlə üçtərəfli görüş keçiriblər. Ancaq bu dəfə dövlət katibinin onlarla hər hansı görüşə təşəbbüs göstərib-göstərməyəcəyi hələlik məlum deyil.