ABŞ banklarına Rusiya aktivlərini açıqlamaq barədə göstəriş verilib

Çərşənbə axşamı Bayden administrasiyası rəsmi olaraq Maliyyə Nazirliyinə göstəriş verib ki, Rusiyanın aktivləri haqda  məlumatları açıqlasın.  Məqsəd onları müsadirə etmək və Ukrayna iqtisadiyyatına dəstək üçün verməkdir.

Turan-ın Vaşinqtondakı müxbiri bildirib ki, söhbət milyardlarla dollardan gedir.

Bu addımdan bir gün öncə prezident Co Bayden bu yaxınlarda Konqresin qəbul etdiyi qanunu imzalayıb. Bu qanun ABŞ hökumətinə Rusiyanın Amerika banklarındakı dövlət aktivlərini müsadirə etmək və həmin vəsaiti Ukraynaya vermək hüququ verir.

Maliyyə Nazirliyinin press-relizində deyilir ki, avqustun 2-dən gec olmayaraq ABŞ-ın maliyyə qurumları öz balanslarında  Rusiyanın aktivləri barədə məlumatı  Xarici Aktivlərə Nəzarət İdarəsinə verməlidirlər.

Əgər bank müəyyən edilmiş müddət bitdikdən sonra öz anbarlarında yeni Rusiya aktivlərini aşkar edərsə, 10 gün ərzində onlar haqda bildirməlidir.

Rusiya aktivlərinin böyük əksəriyyəti Avropada olsa da, hesablamalara görə,  ABŞ bank sistemi təxminən 6 milyard dollar məbləğində Rusiya aktivini etibarlı şəkildə saxlayır.