ABŞ bu və ya digər ölkəyə silah satışı zamanı insan hüquqları amilini nəzərə alacaq

Bakı/28.02.23/Turan:  Bazar ertəsi Bayden administrasiyası elan edib ki, ölkələrin Amerika silahlarının alınması tələbində Vaşinqton insan hüquqlarının vəziyyətini diqqətə alaraq "hər bir ölkəni ayrı-ayrılıqda nəzərdən keçirəcək". Bu, insan hüquqlarını dəstəkləmək məqsədilə edilir, Turan-ın Vaşinqton müxbiri bildirir.

"Biz bir sıra amillərə əsaslanaraq təhlükəsizlik sahəsində yardım göstəririk. Əlbəttə ki, biz insan hüquqlarına daha çox diqqət yetiririk... Lakin biz hər bir ölkəni fərdi olaraq nəzərdən keçiririk",-  onlayn brifinq zamanı dövlət katibinin silahlara nəzarət və beynəlxalq təhlükəsizlik üzrə müavini Bonni Jenkins Turan-ın müxbirinin suallarını cavablandırarkən bildirib.

Ötən həftə dərc edilmiş sənədə uyğun olaraq, əgər ABŞ administrasiyası hesab edərsə ki, bəlkə alıcı ciddi insan hüquqları pozuntularına yol vermək üçün silahdan istifadə edir, o zaman silah verilməsi və ya satışı təqdir edilə bilməz.

Bazar ertəsi Nümayəndələr Palatası Xarici İşlər Komitəsinin üzvü, konqresmen Qreqori Mix bəyanatla çıxış edərək xatırladıb ki, əvvəllər bəzi Amerika silahlarının ixracı ABŞ-ın xarici siyasətinin məqsədlərini pozub, insan hüquqlarının pozulmasına və bəzi hallarda silahların icazəsiz təkrar satışına gətirib çıxarıb.

"Ümid edirəm ki, bu yeniləmə belə ixracın bizim milli təhlükəsizliyimizin maraqlarına xidmət edəcəyini və bizim demokratik dəyərlərimizə uyğun olacağını təmin edən bir çox daha önəmli addımlardan birincisini təmsil edir", -  konqresmen qeyd edib.

Yeni siyasətin ABŞ-ın Azərbaycan və Gürcüstan kimi ölkələrə təhlükəsizlik yardımına təsir edib-etməyəcəyilə bağlı Turan-ın sualına cavabda səfir Bonni Jenkins deyib ki, ümumilikdə, administrasiya bu məsələlərə "fərdi qaydada" baxır.

"Biz ölkələrə təhlükəsizlik sahəsində yardım göstərmək məsələsini nəzərdən keçirərkən bəzi şeyləri diqqətə alırıq. Təhlükəsizliyə yardım göstərildiyi halda, Vaşinqton bunun korrupsiyaya və ya humanitar hüquqların pozulmasına səbəb olmayacağına dair zəmanətlə bağlı ölkələrlə işləməyə davam edir",- Jenkins deyib. 0