ABŞ Dövlət Departamenti: Azərbaycan fiskal şəffaflıqla bağlı minimum tələblərə cavab vermir

Cümə axşamı ABŞ Dövlət Departamenti fiskal şəffaflıq ilə bağlı illik hesabatını açıqlayıb. Sənəddə ABŞ-dan yardım alan hökumətlərin büdcə şəffaflığı təhlil edilir. Dövlət Departamenti Azərbaycanı 2024-cü il üçün fiskal şəffaflığın minimum tələblərinə cavab verməyən və bu istiqamətdə mühüm  irəliləyişə nail olmayan ölkə kimi qiymətləndirib, Turan-ın Vaşinqton müxbiri bildirib.

Hesabata görə, Azərbaycan hökuməti təbii ehtiyatların hasilatı üzrə müqavilələrin və lisenziyaların verilməsi meyarlarını və prosedurlarını qanunvericilik və normativ aktlarda qismən əks etdirsə də, praktikada bu prosedurlara əməl edib-etmədiyi bəlli deyil.

Eyni zamanda, müəlliflər qeyd edirlər ki, hesabat dövründə büdcə layihəsi, qəbul edilmiş büdcə və icra haqqında hesabat, ictimaiyyətə açıq olub (o cümlədən onlayn olaraq).

"Onlar demək olar ki, hökumətin gəlirlərinin tam mənzərəsini təqdim ediblər. Büdcə sənədləri dövlət müəssisələrinə ayırmaları və onların gəlirlərini açıqlayıb. Borc öhdəlikləri, o cümlədən böyük dövlət müəssisələrinin borcları haqda informasiya əlçatan olub və məqbul müddətdə yenilənib", - hesabatda  deyilir.

Builki hesabatda Azərbaycanın fiskal şəffaflığın artırılması üçün atacağı iki addım təsvir edilib. Həmin addımlar bunlardır: təbii ehtiyatların hasilatı üzrə müqavilələrin verilməsi meyarlarının və prosedurlarının qanunda və ya normativ aktlarda tam göstərilməsi və praktikada bu sənədlərin tələblərinə əməl edilməsi.