ABŞ Dövlət Departamenti: Rusiya KİV bütün dünyada Moskvaya sərf etməyən rejimlərə qarşı pozuculuq fəaliyyəti  aparır

Cümə ABŞ Russia Today media qrupunun Rusiyanın bütün dünyada kəşfiyyat əməliyyatlarına tam inteqrasiya olunması və  "Rusiya kəşfiyyat aparatının de-fakto bölməsi"nə çevrilməsinə dair yeni məlumatları açıqlayıb, - Turan-ın Vaşinqton müxbiri bildirib.

"Mən bütün dünyadakı amerikalı diplomatlara tapşırdım ki, RT-nin ayrı-ayrı ölkələrə və onların informasiya sisteminə təsiri barədə topladığımız sübutları bölüşsünlər", - dövlət katibi Blinken jurnalistlərin qarşısında çıxışı zamanı bildirib.

"Əlbəttə ki, hər hökumət bu təhlükəyə necə reaksiya verəcəyini özü qərara alacaq", - Blinken deyib.

ABŞ kəşfiyyatının əsas nəticəsi ondan ibarətdir ki, RT-nin fəaliyyəti təbliğat çərçivəsindən kənara çıxır. Söhbət təsir üzrə gizli əməliyyatlardan gedir, hətta hərbi satınalmaları da əhatə edir.

Amerika müəyyən edib ki, bu əməliyyatlar RT-nin baş redaktorunun müavini Anton Anisimov tərəfindən həyata keçirilib. Əsasən, o, snayper tüfəngləri və səsboğucular, zirehli jiletlər,

gecəgörmə cihazları, pilotsuz uçuş aparatları, radio avadanlıqların alışı ilə məşğul olub..

"Azad və açıq cəmiyyətləri sarsıtmaq üçün Rusiya dezinformasiya silahları bütün dünyaya yayılır. Bütün bunlara əlavə olaraq, RT həm də bir çox ölkəyə təsir üzrə gizli tədbirlərin mərkəzinə çevrilib”, - Dövlət Departamentinin nümayəndəsi Ceymi Rubin Blinkenin çıxışından sonra jurnalistlərə deyib.

"Məsələn, Argentinada, eləcə də Cənubi Qafqazda dövlət siyasətinə təsir göstərməyə çalışırlar. Bu cür cəhdlər hətta Fransa və Almaniya hökumətinin siyasətinə qarşı edilir", - Rubin deyib.

Kreml KİV-i Avropa, Afrika, Şimali və Cənubi Amerika ölkələrini hədəfə alıb. RT öz hərəkətlərini birbaşa Kreml ilə koordinasiya edib və 2024-cü ilin oktyabrında  Moldovada keçiriləcək seçkiləri hədəfə alıb. Rusiya Moldovada  iğtişaşlar yaratmaq məqsədilə faktiki olaraq hibrid müharibəsi aparır, Dövlət Departamentinin nümayəndəsi deyib.