ABŞ Əsəd rejiminin sona çatmasını alqışlayır və Suriyada dinc keçidə çağırır

Bazar günü ABŞ Suriyada Bəşər Əsəd rejiminin sona çatmasını alqışlayaraq, Suriya xalqının dinc və inklüziv gələcəyə can atmasını dəstəklədiyini bildirib, Turan-ın Vaşinqton müxbiri məlumat verib.

"Bu, əzabkeş Suriya xalqının öz qürurlu ölkəsi üçün daha yaxşı  gələcək qurmasından ötrü tarixi fürsət anıdır", - bazar günü prezident Co Bayden Ağ Evdən bildirib.

Onun sözlərinə görə, uzun illərdir Əsədin əsas tərəfdarları "Hizbullah" və Rusiya olub. "Ancaq son bir həftə ərzində onların dəstəyi çökdü, hər üçünün, çünki hazırda üçü də mənim vəzifəyə başladığım vaxtda olduğundan  daha zəifdir".

Bayden əlavə edib ki,  Ukraynadakı müharibə ilə əlaqədar Moskvanın "böyük ziyana" uğraması səbəbindən Rusiyanın Əsədə dəstəyi də uğursuz oldu.

"Bütün bunların nəticəsində ilk dəfə olaraq nə Rusiya, Nə İran, nə də "Hizbullah" Suriyadakı bu iyrənc rejimi qoruya bilmədi. Bu, ABŞ-ın dəstəyilə Ukrayna və İsrailin Rusiyaya və “Hizbullah”a vurduğu zərbələrin birbaşa nəticəsidir", - o deyib.

Bayden həmçinin bildirib ki, ABŞ-ın İŞİD-in dirçəlməsinin qarşısını almaq üçün Suriyaya onlarla hava zərbəsi endirib.

Öz növbəsində, ABŞ-ın yeni seçilmiş prezidenti deyib: "Əsəd getdi. O, öz ölkəsini tərk etdi. Onun himayədarı, Vladimir Putinin rəhbərlik etdiyi Rusiya artıq onun müdafiəsində maraqlı deyil".

Dövlət katibi Entoni Blinken ayrıca bəyanatda bildirib ki, ABŞ hadisələrin  inkişafını "yaxından izləyəcək" və bölgədəki tərəfdaşları ilə qarşılıqlı əlaqədə olacaq. "Biz Suriya xalqına qarşı törədilmiş vəhşiliklərə və sui-istifadə hallarına, o cümlədən kimyəvi silahdan istifadəyə və dinc sakinlərin ədalətsiz saxlanılmasına görə Əsəd rejimini və onun tərəfdarlarını məsuliyyətə cəlb etmək üçün beynəlxalq səyləri dəstəkləyəcəyik", - o deyib.