ABŞ Gürcü Arzusu Partiyasının vəzifəli şəxslərinə viza verilməsinə qadağa qoyulduğunu bildirib

Cümə axşamı ABŞ Gürcüstanda demokratiyanın boğulmasına cavabdeh olan 20 şəxsə viza verilməsini qadağan edib, Turan-ın Vaşinqton müxbiri bildirib.

Bu barədə Dövlət Departamenti bəyan edib, lakin ad açıqlamayıb. Onların arasında hökumət nazirləri, parlament üzvləri, hüquq-mühafizə və təhlükəsizlik orqanlarının əməkdaşları, həmçinin fərdi şəxslər var.

"Təxminən iki həftə əvvəl hakim Gürcü Arzusu Partiyasının Avropa İttifaqına daxil olmaq məsələsini təxirə salmaq barədə qərarına etirazlar başlayandan Gürcüstanda yüzlərlə adam həbs edilib",- Dövlət Departamentinin məlumatında deyilir.

Birləşmiş Ştatlar Gürcü Arzusunun Gürcüstan vətəndaşlarına, o cümlədən KİV nümayəndələrinə, insan hüquqları fəallarına və müxalifətçilərə qarşı davam edən amansız və əsassız zorakılığını qətiyyətlə pisləyir.

Gürcü Arzusu Gürcüstanın Avroatlantika gələcəyindən üz döndərdi, halbuki, əhalinin böyük əksəriyyəti bunu istəyir və bu, Gürcüstan Konstitusiyasında nəzərdə tutulub. Biz çalışırıq ki, demokratiyanın pozulmasında məsul və ya əli olan yüksək vəzifəli şəxslər viza məhdudiyyətlərinə məruz qalsınlar", - bəyanatda deyilir.

Departament həmçinin əlavə edib ki, Bayden administrasiyası Gürcüstanda demokratiyanı pozanları məsuliyyətə cəlb etmək üçün əlavə tədbirlər hazırlayır.

"Biz Gürcüstan xalqı ilə birlikdə güclü, çiçəklənən və demokratik, Avroatlantika birliyinə möhkəm inteqrasiya olunmuş Gürcüstanı görmək istəyirik. Bugünkü hərəkətlərimiz ABŞ-ın qətiyyətini nümayiş etdirir və Gürcü Arzusu ilə əlaqəli 100-dən çox şəxsin və onların ailə üzvlərinin cəlb edildiyi əvvəlki hərəkətləri tamamlayır", - bəyanatda  deyilir.