ABŞ Helsinki Komissiyası Moskvanı Gürcüstanın işğal olunmuş ərazilərində hərbi təlimləri ləğv etməyə çağırıb

ABŞ Helsinki Komissiyası Rusiyanı Gürcüstanın işğal olunmuş ərazilərində - Cənubi Osetiya və Abxaziyada “Qafqaz 12” hərbi təlimlərini ləğv etməyə çağırıb.

Rusiya hökuməti Şimali Qafqazda, həmçinin Abxaziya və Cənubi Osetiyada (bu regionlar beynəlxalq birlik tərəfindən Gürcüstanın əraziləri kimi tanınır) keçiriləcək genişmiqyaslı hərbi təlimlərlə bağlı planlarını açıqlayıb. Bu ərazilər 2008-ci ilin avqustunda Rusiya hökumətinin hərbi müdaxiləsi zamanı qanunsuz olaraq zəbt edilib.

Qeyd edək ki, hərbi təlimlər sentyabrın 17-23-də, yəni Gürcüstanda parlament seçkiləri başlamazdan bir həftə əvvəl keçiriləcək.

“Gürcüstanın işğal edilmiş ərazilərində genişmiqyaslı hərbi təlimlərin keçirilməsi kobud qorxutma aktıdır”, - Komissiyanın rəhbəri, konqresmen Kris Smit bildirib.

“Rusiya hökuməti bu təlimləri ləğv etməlidir, çünki bu, Helsinki yekun sazişində əksini tapmış başqa dövlətlərin suverenliyinə və ərazi bütövlüyünə hörmət prinsipləri ilə ziddir. İstənilən halda Rusiya hökumətinin belə təlimləri keçirməsi faktı göstərir ki, ABŞ Gürcüstanla əməkdaşlığı, ölkənin suverenliyini, müstəqilliyini və ərazi bütövlüyünün dəstəklənməsini  

möhkəmləndirməlidir”, - Smitin bəyanatında deyilir.

ABŞ Helsinki Komissiyası kimi tanınan Avropa təhlükəsizlik və əməkdaşlıq komissiyası federal hökumətin müstəqil agentliyidir. Quruma 56 ölkədə 1973-cü il Helsinki sazişlərinə əməl olunmasının, insan hüquqları, demokratiyanın irəliləməsinin izlənməsi həvalə edilib.

Komissiyaya ABŞ Senatının doqquz üzvü, Nümayəndələr Palatasının doqquz üzvü, Dövlət Departamenti, Müdafiə və Ticarət nazirliklərindən bir üzv daxildir. -25D-