ABŞ-ın Azərbaycandakı səfirliyi Amerikanın müstəqilliyini qeyd edib

Bakı/05.07.19 /Turan: ABŞ-ın Azərbaycandakı səfirliyi Amerikanın müstəqilliyinin elan olunmasının 243-ci ildönümü münasibəti ilə rəsmi qəbul təşkil edib.

Qəbulda Azərbaycanın hökumət rəsmiləri, deputatlar, siyasi partiya rəhbərləri, ziyalılar, ictimaiyyətin nümayəndələri, diplomatik korpusların və beynəlxalq təşkilatların nümayəndəliklərinin təmsilçiləri iştirak edib.

Tədbirdə hər iki ölkənin dövlət himni səsləndirilib.

Daha sonra Amerika əsgərləri simvolik olaraq bayraqları gətiriblər.

ABŞ-ın Azərbaycandakı səfiri rəsmi qəbulda nitq söyləyib.

Səfir deyib ki, Azərbaycan müstəqilliyini bərpa edən vaxtdan bəri ABŞ onu dəstəkləyir.

"25 ildən artıqdır ki, ABŞ Azərbaycanı dəstəkləyir. Bu gün də Azərbaycanın dünyada rolu artdığı vaxt, biz sizin yanınızdayıq" - deyə, səfir bildirib.

Öz növbəsində tədbirdə çıxış edən maliyyə naziri Samir Şərifov deyib ki, Azərbaycanla ABŞ arasında sıx strateji əməkdaşlıq mövcuddur.

Nazir qeyd edib ki, bu gün Azərbaycan ABŞ-ın Cənubi Qafqazda ən böyük ticarət tərəfdaşıdır.

"Ötən il iki ölkə arasında ticarət dövriyyəsi 860 milyon dollar olub. Bu günədək ABŞ Azərbaycana 13, 6 milyard, Azərbaycan isə ABŞ-a 8,2 milyard dollar investisiya yatırıb."

Daha sonra S.Şərifov vurğulayıb ki, rəsmi Bakı Dağlıq Qarabağ münaqişəsinin Azərbaycanın ərazi bütövlüyü çərçivəsində həlli prosesində ABŞ-ın səylərinə böyük ümid bəsləyir.-16С-