ABŞ-ın İrana qarşı yeni sanksiyaları Şahdəniz layihəsinə toxunmayacaq

ABŞ Konqresi İrana qarşı ölkənin mədən və inşaat sektoruna aid müəssisələri “qara siyahıya” salmağı nəzərdə tutan yeni iqtisadi sanksiyalar paketi hazırlayır, habelə 2015-ci ilə qədər İran neftinin ixracını tamamilə datandırmağı qarşısına məqsəd qoyur, bu barədə Ağ Evin məlumatında deyilir.

ABŞ-ın ötən il qəbul etdiyi sanksiyalar artıq İran neftinin xaricə ixracının iki dəfə azalmasına gətirib çıxarıb, iyunda isə Vaşinqton Tehranın nüvə silahı hazırlamasının qarşısını almaq məqsədilə İrana qarşı əlavə sanksiyalar tətbiq edib.

Hazırlanan qanun layihələrinə əsasən, İran rialı alan, satan və bu valyuta ilə hesabı olan maliyyə institutları sanksiyalara məruz qalacaq. “2012-ci ilin əvvəllərindən etibarən bizim hərtərəfli sanksiyalarımızla əlaqədar rial dəyərinin yarısını itirsə də, ilk dəfə sanksiyaların hədəfi bu valyuta ilə ticarət olub”, deyə elə həmin məlumatda bildirilir.

İrana ölkənin avtomobil sənayesi – minik avtomobillərinin, yük avtomobillərinin, avtobusların, motosikletlərin istehsalı ilə bağlı mal və xidmət ixracı da yeni sanksiyaların hədəfidir. Barələrində artıq məhdudiyyətlər tətbiq edilmiş iranlılara maddi dəstək göstərilməsi də sanksiya altına düşür. Şahdəniz yatağından (Azərbaycan) Avropa və Türkiyəyə qaz nəqli üçün nəzərdə tutulmuş boru kəməri layihəsi ilə bağlı İranın bir sıra maliyyə institutları və fəaliyyətləri üçün istisna edilir (bu layihədə İran dövlət şirkəti 10% paya malikdir).

Bir müddət əvvəl ABŞ dövlət katibinin müavini Vendi Şerman bildirib ki, İrana qarşı beynəlxalq sanksiyalar İslam Respublikasının iqtisadiyyatını səmərəli şəkildə zəiflədir və hər ay onu 3-4 mlrd. dollardan məhrum edir. -02D-