ABŞ Konqresi İrana qarşı yeni sanksiyaları təqdir edib

ABŞ Konqresi Nümayəndələr Palatası İrana qarşı iqtisadi sanksiyaları sərtləşdirən yeni qanun layihəsini təqdir edib.  

BBC məlumat verir ki, sənəd bir il ərzində İran neftinin ixracının daha bir milyon barel azaldılmasını nəzərdə tutur. Qanun layihəsini 400 nəfər dəstəkləyib, 20 nəfər əleyhinə çıxıb.

Sanksiya İranın yeni prezidenti Həsən Ruhaninin andiçmə mərasimindən bir neçə gün əvvəl təqdir edilib.

ABŞ Konqresinin qanun layihələri İranın mədənçıxarma  və tikinti sektoru müəssisələrinin “qara siyahı”ya salınmasını nəzərdə tutur, həmçinin 2015-ci ilədək İran neftinin ixracının tam məhdudlaşdırılmasını qarşıya məqsəd qoyur. Ötən il qüvvəyə minən ABŞ sanksiyaları İran neftinin xaricə nəqlinin iki dəfə azaldılmasına gətirib çıxarıb.

İyunda ABŞ İranın nüvə silahı hazırlamasının qarşısını almaq üçün ölkəyə əlavə sanksiyalar tətbiq edib.

Qəbul olunmuş tədbirlərə görə, sanksiyalar İran rialını alan və ya satan, həmçinin bu valyuta ilə hesabı olan maliyyə institutlarına şamil ediləcək. “Bizim ümumi sanksiyalarımız səbəbindən 2012-ci ilin əvvəlindən rial dəyərinin yarısını itirsə də, ilk dəfə olaraq onlarda məqsəd bu valyuta ilə ticarət olub”, - Ağ Evin bəyanatında deyilir.

Barəsində məhdudiyyətlərin tətbiq olunduğu iranlılara maddi dəstəyin göstərilməsi də sanksiyaya düşür. “Şahdəniz” yatağından (Azərbaycan) Avropa və Türkiyəyə qaz nəqli üçün nəzərdə tutulan boru kəməri layihəsinə aid bəzi maliyyə institutları üçün istisnalar edilir. 

ABŞ İranı nüvə silahını yaratmaqda ittiham edir və BMT sanksiyalarının sərtləşdirilməsinə çalışır, həmçinin öz sanksiyalarını sərtləşdirir. 

ABŞ dövlət katibinin müavini Vendi Şerman bildirib ki, İrana qarşı beynəlxalq sanksiyalar ölkə iqtisadiyyatını effektiv şəkildə zəiflədir və hər ay onu  $3 mlrd.-dan $5 mlrd.-ya qədər vəsaitdən məhrum edir. -02D-