ABŞ Moldovada "destabilizasiya əməliyyatları" na görə Rusiyanın dəstəklədiyi subyektlərə qarşı sanksiyalar tətbiq edib

Vaşinqton/06.06.23/Turan: Bayden administrasiyası Rusiya kəşfiyyatı ilə bağlı qrupun yeddi üzvünə və bir təşkilata sanksiya tətbiq edib. Onların demokratik yolla seçilmiş Moldova hökumətində sabitliyin pozulmasında iştirakı ehtimal olunur, Bu barədə Turan-ın Vaşinqton müxbiri bildirib.  

Dövlət katibi Entoni Blinken Moldovada "destabilizasiya  əməliyyatları” nı pisləyərək sanksiyalar elan edib. O bildirib: "Kreml mənfi təsir əməliyyatlarının köməyilə demokratik ölkələrdə sabitliyin pozulması üzrə gizli səyləri davam etdirir.

Bu gün biz Moldovada sabitliyin pozulması əməliyyatlarında iştiraka görə Rusiya kəşfiyyatı ilə əlaqəli qrupun yeddi üzvünün və Moldovadakı bir hüquqi şəxsin adlarını elan edirik.

Maliyyə Nazirliyi şəxslərin adlarını açıqlayıb: Konstantin Sapojnikov, Yuri Makolov, Gleb Xloponin, Svetlana Boyko, Aleksey Losev, Vasili Gromovikov və Anna Travnikova.

Bu şəxslər hazırda İsraildə olan moldovalı oliqarx İlan Şor ilə əlaqəlidir. Şor bu il Kişinyovda hökumət əleyhinə etirazları təşkil edən "Xalq naminə hərəkat"ı dəstəkləyən Rusiyapərəst Şor Partiyasına rəhbərlik edir.

Blinkenin sözlərinə görə, həmin şəxslər Rusiya, həmçinin ABŞ, Avropa İttifaqı, Böyük Britaniya və Balkan ölkələrini də hədəf alan Rusiyanın qlobal informasiya əməliyyatlarının bir hissəsidir.

Bu əməliyyatlar demokratik hökumətlərə və prinsiplərə dəstəyin zəifləməsinə yönəlib. Ayrı-ayrı şəxslər demokratik ölkələrdə demokratik yolla seçilmiş liderləri devirmək və qeyri-sabitlik yaratmaq və ya vəziyyəti pisləşdirmək məqsədilə hökumət əleyhinə etirazların və nümayişlərin keçirilməsi üçün qrupları təhrik edirlər, öyrədirlər və nəzarət edirlər.

Blinken bildirib ki, ABŞ öz müttəfiqləri və tərəfdaşları ilə birlikdə Rusiyanın dezinformasiya kampaniyalarını ifşa etməyə, pozmağa və qarşısını almağa davam edəcək.

ABŞ həmçinin demokratiyanın möhkəmləndirilməsinə, firavan və təhlükəsiz gələcəyin təşviqinə, Avropa ilə inteqrasiyanın dərinləşməsinə və insan hüquqlarına hörmətin artırılmasına yönəlmiş islahatlarda Moldovanı dəstəkləyəcək.